السي فود و لا أطعم
رانيا فتحي عواد
سمكة
جمبري مشوي
جمبري بترفلاي
كابوريا
رز صيادية
تتبيلة السمكة :
زيت
ليمون
توم مفروم
مسترده
ملح
كمون
كسبره
رشة زنجبيل
هريسة شطه ( اختياري )
الطريقه :
هنغسل السمكة و ننشفها و نعمل فيها فتحات من الناحيتين و نتبلها من جوه و بره و ناخد جزء من التتبيلة نقلبه مع بصل و طماطم و فلفل أخضر شرايح و نوزعهم في الصينيه تحت السمكه و ندخلها فرن سخن على درجة حرارة ٢٠٠ من نص ساعة لساعة الا ربع حسب حجمها و بعدين نولع الشواية آخر خمس دقايق علشان تاخد لون و نقدمها بالهنا .
الجمبري المشوي :
زيت
ليمون
توم
صويا صوص
ملح
فلفل
كمون
كسبره
بابريكا
كسبره خضرا
الطريقه :
هنضف الجمبري و نشيل كيس الرمل و نغسله و ننشفه و نتبله و نسيبه ساعة و ننزله على جريل سخن فيه معلقتين زيت و لما ياخد لون نقلبه الناحيه التانيه و ممكن نضيف معاه أثناء الشوي بصل و فلفل و بالهنا .
جمبري بترفلاي :
توم
ليمون
مسترده
زبده سايحة
ملح
كمون
كسبرة
شبت
كريمة
الطريقه :
هنفتح الجمبري من الضهر و نقلب التتبيلة التوم و الليمون و الزبده السايحه و المسترده و التوابل و نتبله و نسيبه ساعه و ننزله في طاسه فيها زبده على الناحيه المفتوحة و لما لونه يغير نقلبه الناحية التانية علشان يكمل تسويه و قبل ما نطفي بدقيقة هنضيف الكريمة و نرش عليه شبت فريش و دوقوا أحلى بترفلاي بالكريمة
الكابوريا :
في حلة على النار هنحط الكابوريا و تكون مغسوله كويس جدا و نضيف عليها بصلة متقطعة و طمطماية و فص توم و فلفل أخضر او حار حسب الرغبه و معلقه من هريسة الشطة و زيت و ليمون و ملح و كمون و كسبرة و بابريكا و نقلبها على النار و نضيف كوباية مية و نسيبها تستوي و بالهنا .
طريقه تانيه للكابوريا :
هنتبلها بنفس تتبيلة السمك و نحطها في كيس حراري و ندخلها الفرن تتشوي و بالهنا .
رز الصيادية :
٢ كوب رز
٢ كوب ميه
٢ معلقه صغيره ملح
نص معلقه صغيره قرفة
رشة كسبرة جافة
معلقه صغيره صلصه
بصلة كبيرة مفرومة
زيت
الطريقة :
في حلة على النار هنحط زيت و ننزل البصل نقلبه لحد ما ياخد اللون البني و نضيف الصلصه و القرفه و الملح و الكسبره و نقلب و ننزل الرز مع التقليب دقيقتين لحد ما الرز يتحمص و نضيف الميه و نسيبه يستوي و نقدمه بالهنا .
هنقدم الأكله دي مع سلطه خضرا و بابا غنوج و مخلل و بالهنا .