طريقة تخزين المانجا من السنة للسنة

رانيا فتحي

أفضل وقت لتخزين المانجا هو شهر أغسطس وأفضل نوعيات للعصير و وتزيين الحلويات والتخزين هى :
الكمبورس ، وفجر كلان ، والكيت ، والزبدة كتاف ، والزبدية وأفضل نوع فى الزبدية فى الطعم هى الزبدية الإسمعلاوى.

أفضل طريقة لتخزين المانجا من السنة للسنة وتفضل بنفس طعمها ومن غير ما نحتاج نضيف عليها مواد حافظة هى غسل المانجا وبعدها ننشفها كويس جدا ونلفها (كل واحدة لوحدها) فى ورق زبدة أو ورق أبيض أو ورق جرائد أو ستريتش بلاستيك او أكياس تلاجة ونفضيها من الهواء ونرصها فى الفريزر
ولما نخرجها نقشرها وهى لسه مجمدة تكون سهلة فى التقشير وماتهدرش معانا لحم كتير.

أما بقى لو مساحة التخزين عندنا ما تسمحش بالطريقة دى ، فاهنغسلها ونقشرها ونقطعها ونحطها فى اكياس ثلاجة بلاستيك ونفضيها من الهواء ونرصها فوق بعضها ، بتقعد لغاية ٣ شهور من غير ما طعمها يتغير.
عاوزينها تعيش فترة أطول من كده بنضيف مادة حافظة زى اللى بيحطوها بتوع محلات العصير احيانا ، إسمها بنزوات الصوديوم بنجيبها من عند العطار وبنضيف واحد جرام لكل ٣ كيلوجرام مانجا ونقلبها كويس ونحطها فى اكياس ثلاجة وبتعيش معانا لغاية سنة كاملة بنفس اللون والطعم.
لكن انا بفضل الطريقة الأولى لأنها أسهل واضمن كتير
وبالهنا والشفا اشربوا عصير طول السنة