الجمعية المصرية للمعلمين ورعاية الموهوبين توزع سعادة
متابعة_ زينب عبد العزيز
(بنوزع سعادة)… كانت مجرد فكرة، الفكرة دي نبعت من إيماننا الشديد بمبادرة فخامة الرئيس “عبدالفتاح السيسي” رئيس جمهورية مصر العربية، مبادرة (حياة كريمة)، كان عندنا طموح كبير وشغف وعزيمة وبالإصرار قررنا ننفذ فكرتنا على أرض الواقع، عملنا إجتماعات وطرحنا الأفكار وناقشناها، تواصلنا مع المسؤولين ولقينا كل الدعم والتشجيع منهم بصراحة ودا اللي دفعنا أكتر للإستمرار في فكرتنا، وخصوصاً إنها المبادرة الأولى من نوعها في مركز ومدينة مطوبس وكان لينا الشرف إحنا كجمعية إننا نكون أول من يخطوا الطريق دا ليس من أجل شهرة أو تشهير ولكن فقط من أجل الخير.
بمساهمتكم حققنا المستحيل وإمبارح بدأنا أول خطوة في مشوار الألف ميل، وحقيقي كنا في غاية السعادة لما عرفنا إن الناس إتأثرت بينا وناوية تعمل نفس الخير، لأن الخير مش حكر على حد وطرقه كتير لكن نخللي بالنا واحنا بنساهم مع أي كيان هل الخير هيوصل بجد وألا هيتم استغلاله في غير موضعه دي نقطة مهمه جداً بنطبقها على نفسنا أولاً ودائماً بيكون هدفنا خير.
بقوة وطاقة شباب مطوبس الجميل الحلم دا اتحول لواقع ملموس، وكنا في غاية السعادة وإحنا بنرسم الفرحة على الوشوش، أهالي مطوبس الكرام زينوا المبادرة بحضورهم، والمسؤولين دائماً كانوا دعم وسند وأمن وأمان وعون كبير جزاهم الله عنا جميعاً كل خير
ولسه الجاي أقوى، ولسه على الطريق مكملين، معاً نبني مستقبلاً أفضل
رئيس مجلس إدارة الجمعية _كمال أبو جازية
