الإخوة
بقلم حاتم بن حورية
خواتي
خوك هو ذراعك
و هو كبير صباعك
فيه الدم متاعك
و هو السند مهما يتمادى
و هو قايد سفينتك و شراعك
وقت تضيع هو يشد القيادة
خوك رياضك وقت الضجة
و هو ثلجك وقت نارك تتلجى
و هو دليلك و الحجة
و هو الصوت إلي نادى
و هو صبرك وقت المرجة
و هو دفاك يوم البرد و صراده
خوك هو الصديق
ديما بجنبك رفيق
تلقاه وقت الشدة و الضيق
و يرحم الكرش الولادة
مثيل موسى بهارون لسانو صار طليق
مع فرعون إلي تجبر بزيادة
و أختك
أختك هي حنانك
و بيها يفخر حديث لسانك
و هي الشرف إلي صانك
مهما يطول الدهر هي الوسادة
و هي إلي تبرد نيرانك
مهما تسرج وقادة
و أختك هي عيلتك و ناسك
و هي منبع ساسك
و هي التاج فوق راسك
و هي الصديقة الودادة
فزاعة يوم عفاسك
متقمصة نمرة هدادة
ويا دنيا هات آش عندك و ثوري
بخواتي زينت سطوري
و بيهم نتخطى صعب بروري
و هوما في عنقي زي قلادة
و رضاية الوالديا مجدافي في عمق بحوري
و بيهم تزيان الشهادة