بقلم _ غادة علي عبد المقصود
“أنا متجوز مراتي بقالي 12 سنة …
هي إحقاقا للحق كانت بتعمل كل الخير معايا وبتدعمني وواقفة في ضهري…لكن بصراحة شديدة أنا تزوجت زوجتي لأنها فائقة الجمال … كانت جميلة جداً وجمالها كان ملفت لكل الناس .
فجأة من حوالي سنة جالها ” كانسر “، في الثدي…
عملنا العملية وكنت معاها لكن بصراحة بعد العملية مش حاسس إن دي الست إللي تزوجتها..مش عارف أجيبها لحضراتكم إزاي” !!
أنا : هي إللي جابت لنفسها ” الكانسر.” ؟
الزوج: لا أنا مقلتش كده… هي جابته ولا حد بعتهولها… أنا بتكلم إني كراجل مش مستمتع في الفراش…
أنا مش مستمتع بمراتي بعد ما شكلها إتغير…
أنا وقفت جنبها جامد جدا مسبتهاش ولا تخليت عنها…
بس دلوقتي مش مرتاح …هل أغلط يعني؟
أنا : يعني عايز تنفصل يعني ولا عايز إيه؟
الزوج: لا أنا مش عايز أنفصل…
أنا كلمتها إني عايز أتزوج وهراعيها برضه وأراعي الولاد…بس أحس إني كراجل مبسوط في بيتي والفراش بتاعي .
أنا : فكرت في الأثر النفسي عليها.. ؟ بسألك هل فكرت في الأثر النفسي عليها إن دي حاجة مالهاش إيد فيها ده إبتلاء من عند الله سبحانه وتعالى..تكون دي النتيجة تتزوج عليها. ؟!!
الزوج : أنا كمان مليش ذنب… أنا تزوجتها بسبب جمالها الفائق .
رأي الشيخ في هذا الموضوع :
الشيخ: الموضوع له 3 جوانب…
من الناحية الفقهية .
الجزء التاني نصيحة أخوية .
الثالث نصيحة للناس كلها ٠
للناس كلها الرسول عليه الصلاة والسلام قال تنكح المرأة لأربع
لمالها ، جمالها ، نسبها ودينها فإظفر بذات الدين تربت يداك…يعني ” الاهم الدين ” ٠
إنما إنت تزوجتها لسبب واحد فقط وهو الجمال يبقى إنت كنت طالب جزئية معينة ٠
راح الجمال..
فين المودة والرحمة ؟
أين السكن و الميثاق الغليظ ؟!
من الناحية الفقهية مقدرش أحرم لك الحلال ٠
نصيحة أخوية بقى أنا لو مكانك مستحيل أفكر كده ٠
مش هقولك إكبت شهواتك ولا إكبت نفسك…
أنت راجل تزوجت 12 سنة كنت عايش فيهم ملك …متمتع بيها فهي إبتليت إبتلاء مالهاش فيه دخل ٠
إنت المقصود بالإبتلاء كمان ٠
هي إبتليت ورضيت وإنتهى الأمر .
حتى لو هتنفصل عنك هتعيش أحسن و أفضل.. إللي ربنا هيحطه في قلبها من الصبر و الرضا أحسن و أفضل 100 مرة من ألف زوج ٠
ولكن بقولك حط نفسك مكانها…
لو أنا على خلاف مع مراتي وكنت ناوي أطلقها قبل الإبتلاء وحصل كده مستحيل أفكر أطلقها…ليه؟ …
رحمة بها ولطفا بها وإني أكون حاسس بها ٠
الرسول عليه الصلاة والسلام كان رحيم بالطير …
دي إنسانة عشت معاها وإستمتعت بها ٠
متزعلش مني ” بالله عليك ما تكسر قلبها ”
.تاجر مع ربنا إنك تقف جنبها ٠
ربنا بيختبرك بيها ٠
أنا: فضيلة الشيخ ..لو كان هو إللي إبتلى كانت هي هتقول أطلق علشان أتزوج؟
الشيخ: مستحيل…رغم إن في تجاوزات من بعض النساء ولكن بقول مستحيل ليه ؟
لأن النساء عند الشدة بيتحكم فيها قلبها الرحيم بتنسى كل خلاف ٠
لو أنت مكانها …تخيل لو قالت أطلق علشان أتزوج مش ممكن إنت تروح فيها؟
النهاردة مش موضوع حلال وحرام وفتوى ٠
الزواج مش شهوة ٠
الزواج ده رحمة ٠
الراحمون يرحمهم الرحمن …إرحمها وألطف بها وربنا هيرحمك في الدنيا و الآخرة ٠
والله لو عملت كده وكسرت قلبها أنا أخاف عليك من إللي ممكن يحصل لك لأن الله سبحانه وتعالى مع المنكسرة قلوبهم
والله أعلم.