أسرار جديدة في زواج منى عراقي

وفاء خروبه 

خرجت الإعلامية منى عراقي في فيديو جديد عبر صفحتها الرسمية بموقع Facebook لتوضح من جديد حقيقة زواجها من أيمن رشوان مقدم برنامج “الدكتور”.

قالت منى عراقي: “إيه القرف اللي أنا فيه ده؟ كل دا بيحصلي ليه؟ أيه المهم في قصة جوازي وارتباطي أنا بقالي أكتر من يومين ما بنمش ونفسيتي اتدمرت عشان قررت أعلن عن حياتي الشخصية، وأنا مش عايزة أتجوز في السر تاني، خلاص ولادي كبروا أخبي ليه؟ وقالوا لي بلاش ترتبطي في السر، ولادي قالوا لي خلاص دلوقتي مفيش داعي

وتابعت: أيمن أنا أعرفه من زمان جدا، بينا كيميا، لما بنتقابل ما بنبطلش ضحك ورقص، ودايما كان سند، الوحيد اللي ممكن أقوله أعمل إيه، وهو يقولي أعمل إيه، لأني بثق فيه ثقة عمياء، لما الخبر انتشر أيمن كلمني وقاللي اتصرفي خليهم يشيلوا الخبر ده، قولتله هتصرف.

وأكدت منى عراقي أن الخبر تسرب بعد ظهورهما سويا في حفل زفاف الإعلامية سالي عبد السلام ورقصهما معا طوال الليل، وأثارت الجدل في النصف الثاني من الفيديو بعد تأكيدها على الزواج قائلة: “مش أيمن، ليه أيمن؟ لأن فرح سالي عبد السلام، انا وأيمن مسبناش بعض، وفضلنا نرقص، مبطلتش رقص أصلاً، الموضوع وسع ان ناس قالولي هو انت حامل، قلت لهم آه متجوزة وحامل، انا مكنتش عارفة الخبر أصلاً، يعني لما كلموني وقالوا لي على الخبر، مبروك انت اتجوزتي؟ قلت لهم آه اتجوزت وحامل، بيكلموني ويقولوا لي ها أخبار الحمل إيه؟ هو أنا اجيب عيال تاني؟

وعلى الجانب الآخر، ظهر أيمن رشوان في فيديو عبر صفحته بموقع Facebook، لينفي ما قالته منى العراقي، قائلا إنها أنباء غير صحيحة، مؤكدًا أنه لا يحب التريند، مبديًا استياءه مما وصفه بالكذب وحب التريند.

هذه ليست المرة الأولى التي تثير فيها منى عراقي الجدل بخبر زواجها، في مارس 2021 كتبت لمتابعيها عبر Facebook أنها ستعلن خلال ساعات عن ارتباطها في بث مباشر على صفحتها الخاصة في الساعة الخامسة والنصف مساء بتوقيت القاهرة، وكتبت: أول ناس أحب أشاركهم متابعي صفحتي، لأنهم مش مجرد متابعين هم السند والضهر ليا ولبعض، أنا مش بدور على الحالات ومصادر شغلي معتمد بشكل كامل على رسائلهم”، وطلبت من جمهورها مساعدتها في توفير طرحة تول صغيرة، وفي الموعد المحدد، فوجئ المتابعون بفيديو تشارك الفنانة وفاء صادق تناول بيتزا!