يا كحك العيد يا احنا.. فرحة أمينة بالعيد
بقلم السيد عيد
اليوم السابع والعشرون
حالة من السعادة والفرحة تنتاب أمينة،ففى أواخر شهر رمضان ، تتجمع الست أم لطفى والست أم محمود مع الست أمينة لعمل كحك وبسكويت العيد والغناء أثناء عمله بأشهر الأغانى المعروفة لديهم خلال عمل الكحك وتسويته مثل أغانى “يا كحك العيد يا احنا.. يابسكويت يا احنا”، و”والله لسه بدرى ياشهر الصيام
إيه يا أمينة مالك مبوزة كده ليه إيه اللى حصل
أمينة هاتك ياصراخ وعويل ياحظى الهباب يالهوووى ازاى ييجى العيد من غير كحك ولا بسكويت.. شكلى يا سيد هقطع وأكيس ولقيتها محضرة ساطور كبير زى ساطور الجزار وشوية أكياس بلاستيك موضوعين على السفرة.
شراء العبد ولا تربيته، وبختك يا أبو بخيت، البيت مش مضمون يطلع حلو.. نجيب حاجة جاهزة أحسن يا أمينة.
وانت معاك تجيب جاهز يا فنجرى ده أنا هوفرلك فلوس الجاهز وهأكلك حاجة بيتى بالسمن البلدى.
لازم كل عيد نتخانق على المصاريف واللبس والكحك والبسكوت ..
كل البيوت كدة وكل الرجالة مهنية ستاتها أه يانى على حظى المنيل.
طبعاً خدتها من سكات ووافقت بعد ماشفت الساطور والأكياس..أصل العمر مش بعزءة.
المشكلة ان البيت أصبح منطقة عمل محظورة كحك هنا وبسكويت هنا وغريبة وبيتى فور هناك وياويله وسواد ليله اللي يفكر يمشى فى البيت من العيال يلاقى الشبشب الطاير فى وشه.
أم لطفى جهزت العجينة قبل بدء عمل الكحك بنصف ساعة، وبعدين قطعتها وعملت أشكال وأنواع الكحك المختلفة ورصتها أم محمود فى الصاجات وسويتها أمينة فى فرن البيت.
قضت أمينة وجيرانها بالمطبخ أربع ساعات يحضّرن كعك العيد، قضين أربع ساعات بالمطبخ عجين وغناء … يا كحـك العيـد يا احنـا
يا بسكـويت يا احنـا
يا شرباتات يا احنا
فـ الكوبايـات يا احنا
يا فناجين يا احنا
يا مرصوصين يا احنا
يا مهلبية يا احنا
عند البياع يا احنا
يا عود ملوخية يا احنا
ع العربية يا احنا
يابلح بريمو يا احنا
يتباع بالكيلو يا احنا
ياشربتات يا احنا
في الكوبيات يا احنا
أربع ساعات بجانب الفرن لخبز الكعك والبسكويت وسيد أفندى ياعينى عليه نفسه في كوباية شاى مع طبق كحك وبسكويت ومنين بعجوة بس مين أمينة مكهربة الكحك والبسكويت وحالفة ماحدش يدوق الا أول يوم العيد.
وبالرغم من الظروف الصعبة التي تمر بها البلاد مع تفشي وباء كورونا ، لكن مع قدوم عيد الفطر المبارك لم تقف كورونا حائلاً أمام المصريين من أجل شرائهم كحك العيد أو حتى صناعته في المنزل ليظل كحك العيد أحد مظاهر الفرحة والإحتفال بقدوم عيد الفطر.
كل عام وكل كحك وانتم طيبين .
