وليد درويش
بعد هذا النص آسف
بعتذرلك يُحتَمَلْ
لسة طيفك بردو خايف
والكلام ناقص جُمَلْ
بعد هذا النص يمكن
تبكي عينك من عيوني
تختفي منك ملامحي
بس أولى انك تسامحي
لا تسيئي من ظنوني
سيبي صورتك
سيبي حيرتك
سيبي روحي اللي ف وريدك
سيبي نسمة من الأمل
عارفة أصلاً لما غيبتي؟؟
لما روحتي ولما كنتي
ولما سيبتك وانتي سيبتي
خدتِّي من جوَّايا إيه؟؟؟
خدتِّي من جوايا روحي
وخدتي قلبي اللي انتي فيه
خدت حاجة والف حاجة
والألم باين عليه
هاتي عينك تبكي حبة
وابقى روحي من سُكات
هاتي ايدك كوني جنبي
خفِّفي عني العياط
وامسحي بعنيكي دمعة
ساحبة وياها الأهات
امحي بإديكي اللي فات
وان صرخت الليلة سهوا
لا كلام أو إلتفات
بس مش ممكن هسيبك
عرضة للخوف والدمار
طول ما صورتك جوا صورتي
لا مكان للإنكسار
تسوى إيه كلمة حبيبتي
لما اقولها وانتي غايبة
ما انتي عارفة لو بعدتِّي
لسة رغم البعد سايبة
سايبة صورة قديمة ذكرى
واخدة حاجة من ملامحك
كل ما افتح عيني فيها
أفضل ابكي واقول مسامحك
كل حاجة بتحكي عنك
ألف ذكرى وألف معنى
يوم ما أوِّل مرة شوفتك
يوم ما ع الحب اجتمعنا
يوم ما كنتي ف حضني دايبة
والألم صاحب دموعنا
كل حاجة وأي حاجة
باقية منك يوم ما ضعنا
لسة فاكر كل حاجة
شاهدة ليا وشاهدة ليكي
لسة فاكر كل نظرة
شاردة ليا من عنيكي
لسة فاكر كل ضحكة
واخدة قلبي ورايحة ليكي
فاكرة إنتي؟؟
فاكرة سهر الليل وحيرته
فاكرة خدِّك يوم ما بوسته
فاكرةطعم الشوق ما بينا
طعمك انتي أحلى منه قبل ما تقولي الوداع
لسة ريحتك جوا صورتي
حامية قلبي من الضياع
لما اموت أو تيجي سيرتي
ابقى قولي انك حبيبتي
واحلفيلهم اني واحد
حب روحك قبل جسمك
حب سيرتك قبل اسمك
حب فيكي الطيبة يومها
وانه واحد خاف عليكي
وانه عمره ف يوم ما باع