شعر/شفيق بن بشير غربال من صفاقس
متابعة عبدالله القطاري من تونس
حنين ممزوج أصلي
دار جدي
يا دار جدي
يا ريحة الأحبابْ،
يا سور عالي
يا مفتـّح الأبوابْ،
يا مجمّعـْنا
يا مسلـّينا
يا موحـّدْنا إذا تلاقينا
جنانك عامرْ
وسطحتك عاليهْ
وقعداتك جنـّه
و قطوفها دانيهْ
ومشمومك من فل وياسمين
تحت الكبوس
يجيبك منين
والعالة منصوبة
والتاي يركرك
بالنعناع وإلا بحارة زلّـوز فريك
وإلا حفنة سوداني
ربي ينجـّيك
والحـُلم يحلى ويبانْ
على صوت الجده
وترشيقة اللوبان
وباب الحوش
عالي و متين
تدخل منو
على سقيفة وإلا اثنين
ووسط دار عامر بابوابو
عيال العم وإلا الخال
بصغارهم عمارة الدار
يا دار جيابة الخير والخمير
بركاتها على الكبير والصغير
منقوشة في القلب
ما تبلاشي
توفى عباد وما توفاشي
وتبقى مشموم تحت الكبوس
ماضيك غالي
ما تعوضو فلوس
يرحم أجدادنا
ومن عطروا دنيتنا
وزرعوا فينا المحبة وسخاها
وعطاوا حياتنا معناها
وعلمونا اللي الدوام محال
واللي الدنيا حال بحال
وما يسعد فيها كان اللي قلبو كبير
كيما يقولوا قد حبل البير
و تفنى الأيام
و سيسانك قايمة
وأنوارك ساطعة
في القلوب دايمة
بقلمي: شفيق بن بشير غربال / صفاقس _ تونس