شعر شعبي/ حاتم بن حورية من حمام الأغزاز تونس
متابعة / عبدالله القطاري من تونس
يا ڨلم شي ما يغرّك
و ما تخلّيها تبان حروفك
و في الجّاش إكمي سرّك
و ما تخلّي حد يشوفك
ما تخلّي حد يشوف
و خلّي تعبك ديما مخلوف
و أصدم و نحّي عليك الخوف
نعرفك آش ما جي يظهر خوفك
و إنزع الطيبة و بحبرك ما تروف
راهو حد ما يدري بڨاسي ظروفك
وحدك تڨاسي عذابك
و حد ما يدري آش إلّي صابك
و كون عليهم ديما مسكّر بابك
و ما تبوح تورّيهم خاوي جوفك
و زيد إدعس عليهم شالخ نابك
و عرٌيهم بعد ما تغطّو بصوفك
تغطّو بحنانك
و ذاڨوا من لذّة ثمرات جنانك
فيهم من شبع و دار عليك و خانك
و ناوي ڨطعان رڨبتك و محذوفك
نوصّيك ما تتحكّم في حبر لسانك
ونترجّاك بربّي ورّيهم حر كفوفك
نترجّاك ڨوم ورّيهم
و ويّاك يجيك يوم و تراضيهم
إلدغهم بسمّك تصبح شامت فيهم
و خلّي فضايحهم تبان في مكشوفك
يبان الحـــق و الحقيقة تعرّيــــهم
يبانو مين ضدّك و مين ضمن صفوفك
يا ڨلم شي ما يغرّك
وما تخلّيها تبان حروفك
و في الجّاش إكمي سرّك
و ما تخلّي حد يشوفك
بقلم حاتم بن حورية
في 2024/03/13