بقلم د_ابوزيد بيومي
معذور مدرس فصلنا
لما ضربني بالعصايه
فوق ايديا اللينه
لما وقف يصرخ بصوته
في العيال وانا وسطهم
قولوا ورايا بانتظام
امي ابي
يرسم مدرس فصلنا
يرسم لنا حبة حروف
يصرخ يشاور للعيال
برضه العيال كانت تقول
امي ابي
الا انا
شافني المدرس من بعيد
قوم ياولد
قوم يا بليد
ماتقولش ليه زي العيال
واطاطي راسي
والعيال تضحك عليا . كلهم
والكلمه فيا تنحبس
وعنيا تتكلم بكا
يمسك مدرس فصلنا
يمسك عصا
افتح ايدك ياولد
تنزل عصايته بالعنا
فوق ايديا اللينه
ابكي واقول
معذور مدرس فصلنا
معذور مايعرفش السبب
إن الحروف اللي كتبها
للعيال . كل العيال كان عندهم
نفس الحروف
الا انا. الا انا
عضو اتحاد كتاب مصر
وعضو نادي ادب طما. سوهاج