الكنافة بالقشطة
رانيا فتحي عواد
المكونات:
١- عدد نص كيلو كنافة.
٢- عدد ١ كوب قشطة.
٣- عدد ١ كوب سمن + عدد ٢ معلقة كبيرة سمن .
٤- عدد ٢ كوب سكر .
٥- عدد عصير ١ ليمونه.
٦- عدد ١ معلقة كبيرة عسل ابيض .
٧- عدد ١ باكت فانيليا .
٨- عدد ٢ كوب و نص ماء .
الطريقة :
١- في صينية مناسبة هندهنها بالسمن من كل الجوانب .
٢- هنحط كل كمية الكنافة في الصينية و هنحط عليها كوب السمن و نفضل نقلب بايدينا لحد ما كل الكنافه تتغلف بالسمن .
٣- هقسم كمية الكنافة هسيب نصها في الصينية و هركن النص التاني علي جنب .
٤- هفرد النص الاولاني في الصينية و اضغط بايدي لحد ما يغطي الصينية كلها و يبقي متساوي
٥- هضيف كوب القشطه و افرده كله ما عدا الجوانب عشان متتحرقش .
٦- هضيف نص كمية الكنافة التانيه فوق القشطه و افردهم و اضغط براحه عشان القشطه متخرجش بره لحد ما اساوي الصينية كلها .
٧- هضيف معلقتين السمن الكبار علي وش الصينية .
٨- هدخل الصينية فرن مسخن مسبقا درجة حرارة متوسطه الرف الفي النص .
٩- لما تاخد لون ذهبي من تحت هقلب الصينية علي الوش التاني و اطفي النار لما الوش التاني ياخد لون ذهب برده و اسيبها تهدي شوية متبردش اوي تهدي شوية .
١٠- الشربات بقي هجيب اناء مناسب و هحط الماية و السكر و اقلب علي نار عالية حتي الغليان .
١١- ههدي النار و اسيب الشربات يتقل لمدة ربع ساعه اول ما يتقل معايا و احصل علي القوام المناسب مش تقيل اوي و مش خفيف اوي .
١٢- هضيف عصير الليمونه و معلقة العسل و اقلب
١٣- هطفي علي الشربات و اضيف باكت الفانيليا و اقلب .
١٤- هسيب الشربات يهدي ميبردش اوي يبقي دافي .
١٥- الكنافه و الشربات يبقوا دافيين هما الاتنين مش سخنين و اضيف بقي الشربات للكنافه لحد ما تغطيلي كمية الكنافه بتاعتي .
ملحوظه :
الشربات ممكن يفيض منه عادي هشيل الكمية الفاضت في الفريزر و استخدمه في اي وصفة تانيه عادي .
و بالف صحة و عافية
