التجديد النفسي.
د. ياسمين عبدالله.
في وقت بنعدي فيه كل يوم بنفس الروتين، ونفس التعب، ونفس الشعور إننا مضغوطين من كل اتجاه، بيبدأ جوانا صوت صغير بيقول:
“أنا محتاج أبدأ من جديد.”
مش شرط نغير شُغل أو مكان أو ناس، لكن بيكون جوانا احتياج نرجع نرتاح، نرجع لنفسنا، نحس إننا عايشين مش بس موجودين.
وده هو معنى التجديد النفسي.
التجديد النفسي مش قرار مفاجئ، ولا خطوة كبيرة لازم نخطوها مرة واحدة.
هو حالة وعي داخلية، نبدأ نلاحظ فيها إحساسنا، ونراجع فيها اختياراتنا، ونشوف إحنا ماشين فين وليه.
– خطوات تساعدك على التجديد النفسي:
1. راقب مشاعرك:
ما تتجاهلش التعب ولا الحزن اللي جواك.
اسأل نفسك: “أنا حاسس بإيه؟”
وليه؟
الفهم هو أول خطوة في التغيير.
2. خفف الضغط على نفسك:
مش لازم تكون دايمًا قوي ،الهدوء مش ضعف، والراحة مش كسل،دي خطوة لإعادة الشحن.
3. راجع علاقاتك:
فيه ناس بتريحك، وناس بتستهلكك.
التجديد معناه إنك تختار وجودك فين، ومع مين.
4. غير من يومك:
روتين بسيط جديد، تفصيلة صغيرة بتحبها،أي حاجة ترجعلك إحساس الحياة،حتى لو 5 دقايق في اليوم.
5. سامح نفسك:
أنت مش مثالي، ومش لازم تكون .
كفاية جلد ذات، ابدأ تتعامل مع نفسك كإنسان بيحاول، مش بيتحاسب.
6. جدد نيتك:
قول لنفسك: “أنا ناوي أعيش بهدوء… أعيش بوعي… أعيش وأنا مرتاح.”
النية دي كفيلة تغير كل حاجة بالتدريج.
وأخيراً…
التجديد النفسي مش رفاهية،هوا احياناً بيكون طوق نجاة.
