يوسف عمر موهبة ظلمها “شباب إمرأة “
يوسف عمر موهبة ظلمها “شباب إمرأ”
عادل النمر
يوسف عمر يبقى ابن الست لبنى ونس والست لبنى للي ميعرفهاش من الممثلات الجامدين اللي للأسف مخدتش حقها بس لو حابب تشوف دور حلو ليها ممكن تشوف مثلاً فيلم إشارة مرور أو مسلسل خالتي صفية والدير أو اي دور صغير لها هتلاقيها بتجيد فيه بس عامة النجومية حظوظ والست لبنى كان حظها قليل المهم خلينا نتكلم شوية عن يوسف عمر واللي اجتهد في الشكل الخارجي للدور يعني مثلاً هتلاقيه في المشاهد الأولى مع شفاعات كان واقف مرتدي “فانلة بحملات” عشان تبرز عضلات ساعده واللي اعتقد إنه ركز في تمرينات حمل الأثقال عشان يبان بالشكل ده طب إيه فائدة ده على الدراما هقولك أحد الأسباب الرئيسية اللي لفتت نظر شفاعات لإمام هو قوته الجسدية وفي مشهد مشهور اوي في فيلم شباب إمرأة لشفاعات وهو بتنظر لإمام بشهـ،،وة من خلف الزجاج وهو نايم وشكري سرحان نفسه قال إن أحد أسباب اختياره للدور أصلا هو إنه جسده رياضي وده اللي حاول يعمله يوسف ونجح فيه.
ثاني عامل لترشيح يوسف عمر للدور هو إن وجهه منحوت هتقولي يعني ايه منحوت وهل هيفرق هقولك شوف كل ابطال السينما من اول شكري سرحان وقبله عمال حمدي مروراً بنور الشريف وسيف عبدالرحمن ومحمد صبحي هتلاقي وجههم منحوت وحتى في السينما العالمية هتلاقي جيمس دين ومارلون براندون في بداياته كان وجهه منحوت ومخرجي السينما بيحبوا الوجوه المنحوتة في فترة الشباب لأنها بتدي احساس الفتوة والشباب اكثر من غيرها وده عامل آخر لاختيار يوسف عمر للدور.
طب يا سيدي هما اختاروا يوسف عشان الـ physical أو المظهر الخارجي طب بالنسبة للأدوات التمثيلية هقولك هنا بقى يجي دور المخرج ، فاكرين لما اتكلمنا علي الطفل علي البيلي اللي لعب دور يوسف في مسلسل لام شمسية قولتلك أن الطفل بيمثل احسن من ممثلين كبار .. نفس الطفل لو جبته مع مخرج تاني معندوش دقة كريم الشناوي هتلاقيه “بيلوش” أو بمعنى آخر إن المخرج هو عين ومرآة الممثل يعني لو انا ممثل فأنا مش عارف ان كنت حلو ولا وحش حتى لو عندي انطباعات لكن مش دائماً صادقة لكن المخرج هو اللي بيقول والله ده فلان ده كان حلو او وحش أو محتاج يزيد هنا من رد فعله أو يقل هنا من رد فعله وده هتلاقيه محصلش سواء مع يوسف أو حتى غادة عبدالرازق واللي بتمثل وهي واخده راحتها على الأخر.. ناهيك عن الكاستينج يعني أنا لحد دلوقتي مش متخيل داليا شوقي تعمل دور البنت اللطيفة الناعمة واللي هو إزاي يعني ولما حضرتك تعملي الأدوار ديه مين يعمل دور التوكسيك.
أخيرا السيناريو لمحمد سليمان عبدالملك والراجل ده محير جدا يعني ممكن يعملك أعمال فيها تفاصيل وجامدة جدا زي صوت وصورة بجزئيه وأبواب الخوف وراجعين يا هوى وممكن تلاقيه بيعمل أعمال زي حسام الدين مصطفى كده “اكل عيش واقساط” .. عامة طول عمر الدراما المصرية فيها ترزية دراما حتي عمنا أسامة أنور عكاشة اشتغل ترزي دراما للست فاتن حمامة والسيدة سميرة أحمد وده بإعترافه لكن الفرق بينه وبين اي ترزي درامي اخر أنه مكنش بيطاوع النجم في كل كلمة يعنى احذف هنا و زود هناك أو ضيق من تحت الابط واعملي كسرة في العباية من تحت وأقصد طبعاً التفاصيل الدرامية واللي هي لو اتلعب فيها الدراما تبوظ واعتقد هي ديه مشكلة الأعمال اللي بيكون فيها النجم أو النجمة مسيطربن علي كل حاجة فيها.. أخيراً يوسف لو اخد فرص اكبر مع مخرجين بيهتموا بالتفاصيل هيظهر أكثر.
