يعني إيـــه ؟!
بقلم / مايسة إمام
يعني إيه مقولش لأ
وأبقي تحت المستوي؟!!!
يعني إيه عيني تنكسر
ماالقي لها يوم دوا؟!!!!
يعني إيه يشتروا ويبيعوا فيَّ
ويقولوا صاحب غوى ؟!
والتمن يقبضوه
وأنا اللي بالبيع اكتوى
يعني إيه ألبس توب الذل
وأتعود عليه ؟!
وأحلل حرام وأقول
طب وماله كله فيه ؟!!
أعمل من الباطل حق
والحق أكتف إيديه
المتهم أقول برئ
والبرئ أدوس عليه
إفتراضا لو قبلت
ولبست عقلي مركوب
واستحليت الكبائر
ومليت جوفي بالذنوب
هقدر أهضم ذلي أنا
وكسرة نفسي وهي طوب ؟!
هقدر أشرب يوم عليها
وأرتوي وأقول تدوب ؟!
الشطارة في قاموسنا
مش بإيه نستفيد
والمكاسب مش محسوبة
عندنا بمين يفيد
أو رايحة لفين المصالح
و معاها منين ماتريد
إحنا الأصل في دمنا
خاتم اسمه عـ الوريد
الشطارة في قاموسنا
شطارة حب ومشاعر
والأصيل ع الراس نشيله
ونقيد علشانه المشاعل
واللي يمد لينا يد
نبض القلب يجيه مسافر
واللي يخون ملوش ثمن
أو حتي نعمله خاطر
قولوا كمان مهما تقولوا
القوالة ما تِعر
قول الخسيس معروف وباين
رخيص ثمنه ماله سعر
كل ماقال وعاد وعاب
اعرف إن حاله مُر
وإن نقصه مجننه
حاله يغم ولا يسر
واعرف إن نبح الكلب
عمره ما يهز ولا يضر
