من أسرار الشيف
بقلم / زينب عبد العزيز
١-هتعملي طشة الملوخية مدقيش الكزبرة مع التوم شوحي التوم في السمنه الاول وقبل ما ياخد لون دهبى انزلي بالكزبره ياخد لون دهبى وطشيها علي الملوخية
٢-لما تيجي تعملى الباميه بالصلصه او الويكا ضيفي عصير نص ليمونه بعد ماتنزلي بالباميه علي طول بتمنع اي زفلطه بتاعة الباميه
٣-هتعملي محشي كرنب خلي الشوربه في سوا أخر سطر مش اكتر
اما محشي الكوسه والباذنجان الشوربه توصل للنص بس
٤-هتسلقي مكرونه حطي في مية السلق ملح بس بلاش زيت عشان الصوص ميفصلش عن المكرونه
٥-لما تيجي تعملى رز متغمقيش الشعريه خليها دهبي فاتح عشان الرز يبقي لونه ابيض
٦-السمبوسك اقليها علي نار متوسطه مش عاليه عشان تبقي مقرمشه
٧-مكرونه الكشري بعد ماتسلقيها حطي عليها معلقة زيت من اللي حمرتي فيها البصل بتديها طعم لذيذ ومتخلهاش تلزق في بعضها
٨-حطي رشة سكر لشوربة الملوخية هتخليها في حته تانيه خالص
٩-عشان تاخدي أكبر كميه عصير من الليمون حطيه فى ميا سخنه قبل ماتعصريه
١٠-هتعملي ورق عنب اعصرى عليه ليمونه قبل مايستوي بشويه
١١-ضيفي معلقة صغيره سكر علي اي تسبيكة هتعمليها اول ماتسقطي عصير الطماطم ضيفيها بجد بتبقي تحفه
١٢-حطى شريحة من الليمون وانتى بتسلقى البيض القشرة هتفصل عن البيض وهتشقريه بسهولة.
