سويسرول الخلاط
إعداد/زينب عبد العزيز
المقادير:
٤بيضات
كوب الا ربع سكر حبيبات
ربع كوب زيت
كوب دقيق (لازم يكون منخول)
معلقة صغيرة بيكنج بودر
كيس فانيليا
نص معلقة صغيرة خل
٢معلقة كبيرة كاكاو خام
ذرة ملح
الحشو :
ممكن تحشيه مربي وممكن كريم شانتيه زي اللي في الصورة
الكريم شانتيه:
نص كوب كريم شانتيه خام بيتجاب من عند العطار
نص كوب ماء او لبن مثلج
نص كوب سكر
وممكن تضيفي معلقة كاكاو 
في الاول هنضرب السكر مع المياة بالمضرب اليدوي أو الكهربائي وبعدين هننزل بالكريم شانيته ونضرب لحد مايدينا القوام المتماسك
لو بتضربي الكريمه بالمضرب اليدوي هتاخد وقت شوية لحد ماتديكي القوام المظبوط
طريقة السويسرول:
هتسخني الفرن وتحضري صنية مستطيلة متوسطة وتدهنيها زيت او سمنه وترشي عليها دقيق تبطنيها بيه بس ميكنش كتير (ده بديل ورق الزبدة )لو عندك ورق زبدة هيبقي تمام هتحطيه 
في الخلاط هنضرب كل المكونات السابقة
في الاول هنضرب السكر والبيض والفانيليا والخل والزيت وبعد كده هنحط الدقيق وذرة الملح والبيكنج بودر والكاكاو ونضرب تاني
وننزل بالخليط في الصنية ونظبطه براحة بالمعلقة لحد مايملي الصنية ويبقي تمام
ندخله الفرن زي الكيكه العاديه بس بتاخد وقت من خمس لعشر دقائق ونطلعه هيكون استوي وممكن تختبريه بخله السنان
اول مايستوي وتطلعيه من الفرن هتجيبي ورقة زبدة أو كيس بلاستيك كبيرة وتقلبي الصينية عليه هينزل الكيك وتلفيه رول علطول وتسبيه يبرد حوالي ساعة بعد ما يبرد نجيبب الكريم شانتيه أو المربي حسب الرغبة ونبدأ نفتحه بشويش ونحشيه بيه وبراحة عليه عشان متكسرش منك
بعد ماتخلص حشو هتلفيه تاني ممكن تدهني وشه بمربي وترشي جوز هند أو هتدوبي شوكولاتة في حمام ماء وتنزلي بيها علي السويسرول وتحطيه في التلاجة ٣ ساعات ولو مستعجلة هتحطي في الفريز ساعة وبعدين تطلعيه تقطعيه
وبالهنا والشفا 
