شعر شعبي/محمد القاسمي من تونس
متابعة عبدالله القطاري من تونس
عدّيت قْلت انشوف
الدّار القِْديمة وحوشنا …..
والارض والسّاحات
و حتّى زريبة هوشنا…
نلقْى بناية خالية اتناديني……
فيها اثر من رحلتي وسنيني….
وفيها اثر قديييييم
وحاجات بيني وبيني…….
وفيها بقايا روح
وفيها رسوم جروح
و فيها بقايا ذاكرة توجعني…
لايام حلوة ماضية ترجّعني……
اتذكّرت ريحة دارنا
و ڨرابنا واجوارنا……
اتذكّرت نظرة جدّي
و تاريخ كل كبارنا….
اتذكّرت عز قْديم
مرسوم وين افكارنا….
اتذكّرت بيت المونة
ومطمورنا والڨمح
والفرن والطّابونة
و تاريخ ياسر سمح
و الڨاز و التاڨيدة….
و بابورنا والميدة……
اتذكّرت سدّة بيتنا و المصرف
وامحمّصة في بردنا و رغيدة….
اتذكّرت روحي وقت كنت صغير
اتذكّرت لعب الذر وسط احواشنا
اتذكّرت نادر ڨمحنا و البير
اتذكّرت حتى حرثنا و احراشنا
اتذكّرت اهل الدّار…..
و فكرت جار و جار…
حيّرت عمق الذاكرة
و اشواقْ للاوكار….
وتبقى بقايا الصّغر في ذاكرتي….
رحلة صفاء في البال ديمة راسمة…
محمد الڨاسمي….