القاهرية
العالم بين يديك
Index Banner – 300×600

عيد الكبير 

254

 

شعر شعبي / رفيق بن بشير غربال من صفاقس

متابعة عبدالله القطاري من تونس

 

آمس ، وانا صغير

والدنيا بي تطير

نستنى في عيد الكبير

علوش و شواي وكانون

و بازين نشا متقون

وقلاية و زيت زيتون

وثمة اللي بالعسل ممحون

ولمتنا كبرت بينا

واعدادنا تفوق الطزينة( 12)

وصغار آمس

كبار اليوم

يا دايم ، لا حال يدوم

نوقة وحلوى وحلقوم

والمشهد فيلم عشناه

من الذبيحة للنفخان

وتعليق السقيطة

بعد السلخان

ودرس علوم في الابان

هذي الدوارة ،

وهذا المعلاق،

وهذا القلب

وهذا السفاق

وهذي طلاقة النساء

وهذي عروسة محرقسة

معفية في عامها الأول

وممكن داير تزيد تطول

بصغيرها تحنن عليه

واللمة تزيد تكبر بيه

ويتعدى العيد والوانو

وتبقى طعمتو بين اسنانو

كبدة على الكبدة تتربى

و اللحمة بالهنا تتعدى

والبازين مسكو فايح

وزيت قلايتو فوقو سايح

يرجع بينا سنين و سنين

والعالم ، ربي ، في الملكوت

من يرجع ، ومن يموت

ليكم الكل العمر والصحة

ويعطينا ويعطيكم الفرحة.

وربي يبلغنا ويبلغكم العيد

بقلب صافي

و حب شافي

ويد للخير ممدودة

هي للسعد معدودة

و ان شاء الله أعيادنا تدوم

ثلاثمية و خمس وخمسين يوم

و زيدها حداش

وبركة ربي ما توفاش.

 

قد يعجبك ايضا
تعليقات