باباي
شعرشعبي/محمد القاسمي من تونس
متابعة عبدالله القطاري من تونس
باباي وقت الضايڨة نلڨاه
وفي كل خطوة صورته تعرضني۔۔
و باباي نبع الحن في محيّاه
و بكل كلمة يقولها يروّضني۔۔
باباي فيه احساس
وماهوش كيف الناس
باباي هو الساس
في طيحتي ينقذني
هو تاج فوڨ الراس
والحضن عنده حضني
و باباي نعشڨ طلته و زهيرة
ونعشق خصايل سيرته وهواه۔۔
وباباي هو البوصلة و الشيرة
وكل الخطاوي ماشية مع خطاه۔۔۔۔
وباباي بيده الحل
وباباي هو الكل
هو مسندي والضل
والدرب عندي بناه
و من طلته ما انـمـل
انحب وهرته و نهواه
وباباي صار اليوم طفل صغير
ويرتاح كيف يشوفني يحكيلي۔۔۔
اتزيد فرحته وانحس بيه يطير
من كل حـاجة توجـعه يشـكيـلي۔۔۔۔۔
اتزيد فرحتي كي انودّه
و اصعيب خيره انردّه
وباباي وقت الضايڨة نلڨاه
وفي كل خطوة صورته تعرضني۔۔۔۔
و باباي نبـع الـحن في ثناياه
و في كل وڨت يكون هو حضني ۔۔۔۔
