ما قلبي عشق مرّة

 

شعر شعبي/ حاتم بن حورية من حمّام الأغزاز تونس

متابعة عبدالله القطاري من تونس

 

نا ڨلبي عشڨ مرّة

و عشڨو طاح في بنت ناس حرّة

 

بنت أصل كاملة لوصاف

جايبها صيد دفداف

بحاري و جايب ساف

في كنيني تشع مثيل الدرّة

 

تشع مثيل الياڨوت

جميلة و رڨيڨة صوت

و راهي الدّنيا بخوت

و يرحم من جاب و قرّى

 

أنثى في الدّرك صبورة

حربيّة مفاتحها ذكورة

مڨدودةجميلة صورة

يحجبها من الحاسد و شرّه

 

ربي يسترها و يحماها

عند الضيم ديما نلڨاها

معايا في الشدّة وأنا معاها

آش خلّا ڨلبي يبوح بسرّه

 

لا جات كيفها بنت ملوك

تحكم في راجلها مملوك

وڨت الضّيم إطّيشه متروك

زيد بعد الدّرك راسه يتعرّى

 

و نا طبايعي ديما صعيبة

واللّغز من لبعاد نجيبه

خترتها تكون ليّا حبيبة

و ڨلبي مشى في الجرّة

 

نا ڨلبي عشڨ مرّة

و عشڨو طاح في بنت ناس حرّة

 

بقلمي حاتم بن حورية