تفريز الثوم
رانيا فتحي عواد
ان شاء الله موسم التوم الجديد هايكون في شهر مارس والكل بيخزن توم مفروم
ولو عايزة التوم المتفرز عندك يبقى لونه فاتح وريحته ديما تبقى فريش مهما قعد مدة في الفريزر
تعالى اقولك على السر اللى تعمليه بيخلى التوم لونه ديما فاتح وفريش مهما قعد في الفريزر من أول معلقة في البرطمان لآخر معلقة
طبعا كلنا بنفرم التوم في الكبة عادى
حطي مع كل فرمة توم معلقة كبيرة خل وهو ده السر اللى بيخلى لونه فاتح وفريش هتقوليلى ليه الخل هقولك علشان أولا الخل بيخلى اللون فاتح وجميل
ثانيا مادة حفظ وتعقيم
هتقولي هو مش هايغير الطعم هاقولك لا
طيب اعمل بيه الملوخيه عادي ايون عادي لانها معلقه وحده علي كميه كبيره مش هاتاثر في الطعم بس هاتفرق قي اللون
وكمان ضيفي مع التوم وهو بيتفرم حبة ملح وافرميه كله كويس وبعدين عبيه في البرطمانات وحطي على وشه حبة زيت واقفلي البرطمان وعلى الفريزر مباشرة
جربى النصيحة دى وعمرك ما هتندمى
أنا حبيت اشاركم علشان الفايدة تعم على الجميع وجزانا واياكم خيرا
احفظيه في برطمنات زجاج عادى وعمرها ما هاتتكسر ولا هاتفرقع فى الفريزر وهيسهل عليكي وهتاخدي بالمعلقة على اد استخدامك وكمان بكدا عمره ما بيعمل ريحة في الفريزر
وبس كده اتمنى يعجبكم
ملحوظه
انا طول عمري بطحن التوم بس بصراحة بقالي سنه بشيله في الفريزر متقشر فصوص من غير فرم وبطلع منه وقت الحاجة بيفك مجرد ما بتمسكيه في ايدك
الطريقة دي جميله جدا ومش بتعمل ريحه خالص في الفريزر ولما بتدقي التوم او بتفرميه في الكبه بيبقي كانه لسه فريش مافقدش اي زيوت طياره فيه
ممكن تجربي شويه وإن عجبك اعملي الباقي كدا
او اعمليه مفروم زي الطريقه اللي قولتها لك فوق دي كل الناس بتعملها و خصوصا مع التوم الاخضر اللي لسه طالع الطري
