تفـــاصيـل وجهـــــي
شعر شعبي/محمد القاسمي من تونس
متابعة عبدالله القطاري من تونس
انشوف روحي في المراية
انحسنـي واحـد غـريب،،،،
املامـحي فيـهـا حكايـة
و فيها من كُبري نصـيب،،،،
ضـايعـة رسـوم البدايــة
وشكلي حسّيته عجيب،،،
و باينـــة رسـوم الزمــن
وبايـنـة رسـوم الشقْــاء
وظـاهـرة علـيّا المـحــن
وراح من وجهي الصفاء
انخاف حصّـلت النهايــة
و روحي لازمها طبـيب،،،،
يشوفنـي يكشـف علـيّـا
وعلّـي عـشته وصار فيّا
وماضـي خـلّيتـه ورايـا
وفصل من عمري صعيب،،،
يا طبيـبي هات وصـفـة
شوفلي وصـفة شـفــاء،،،،،
وشوفلي اتفاصيل عمري
وعــــــود بيّـــا للـــوراء،،،،
ممــكن انرجّــع شبـابـي
وننسى في لحظة عذابي..
انعيــش فـترة مالصّـبا ،،،،
وذكرى من ماضي تعدّى
وفصل من عمرى مضى،،،،
وينـــه يا جرّاح جرحي..
ولاش ضاع اليوم فرحي..
ولاش غلبــتنا السّنيــن..
وزاد للــماضي الحنــين..
وكاثرة اتجاعيد وجهـي
مرايــتي تشهــــد علَـيْ
الكُـــبْر مَا عِنـــده دواء،،،،
شبيك يا تفاصيل وجهي،،،
شاحـبة و كـلك همـوم..
وكنت يا تفاصيل وجهي،،،
ضــاويـــة زي النجـــوم..
وصرت يا تفاصيل وجهي،،،،
تاعبــــة و عندك غيــوم..
وعود يا تفاصيل وجهي،،،،
ال شــطّك الهادي و عوم..
مرايتـــي تحكـي عتابك
كيـــف غلبـَتـني الحـيـاة
وكيـــف غالبــني الزمـان
وكيـــــف ضيّعته شبابك
شايـــفك فـــيّـا اتلــوم
الوقت يا تفاصيل وجهي،،،
مالبـــــداية للــنـــهايــــة
لقْيــــته غالــبنـي رهيب،،،،
محمــد القــــــاسمي،،،،،،،،
