القاهرية
العالم بين يديك
Index Banner – 300×600

يا ولاّدة

73

شعر شعبي /فاروق الجعيدي من تونس
متابعة عبدالله القطاري من تونس

نهْدِيكْ ڨُولْ صعيبْ عَ الڨٓدّٓادَه
يٓا امّ الْعُيُونْ السُّودْ يٓا وٓلاّدَه

نهْدِيكْ ڨُولِي نْعَبِّرْ
يا غاليَه يا امّ الغثيثْ مْعٓطّٓرْ
حُبّكْ فيرضَه في الكتابْ مْسٓطّٓرْ
مٓفْرُوضْ مِنْ رٓبّ الْعِبٓادْ عْبٓادَه
في طاعتكْ مُوحٓالْ يُومْ نڨٓصّرْ
نهــديكْ روحـي والعُمُـرْ وزيـادَة
ولا تاخذي في خاطركْ تتكدّرْ
ما يجيشْ يُــومْ تنافسـكْ وَسّادَه

ونهديكْ نٓظمْ صعيبْ ع الڨٓدّادَه
جاهزْ بلا تلحينْ للنّشّادَه
يا امّ العيون السّود يا ولاّدَه

كْلآمِكْ عٓلٓيَّ سِيفْ
يا شاڨِيَه عليَّ شتاك وصيفْ
تنادي عليّ نجيكْ مثل الطّيفْ
فارس ركبْ برڨ الخريفْ جوادَه
انتِ المدينَه والقُرى والرّيفْ
وانتِ الوطنْ والبحر وانتِ مدادَه
انتِ شتاء وربيع وانتِ خريف
وانتِ ثمار الصيف وڨْت حصادَه

نهديك حرف صعيب ع الڨٓدّادَه
جاهز بلا تلحينْ للنّشّادَه
يا ام العيون السّود يا ولاّدَه

نجيبْ الڨٓمَرْ فْ إيدي
نزيدكْ سنين العُمْرْ ليلة عيدي
اُشرطْ عليّ يا الحبيبَه وزيدي
ما نفوتْ في كلامكْ رسوم حدادَه
ولوْ كان تطلبني فْ حٓبَلْ وْرِيدِي
نزيدكْ معاه الرّوح منّي زيادَه
ونعطيكْ نبض الڨٓلْبْ كانْ تْرِيدِي
يسـهـر على نبضــكْ على تعدادَه

ونهديكْ شِعر صعيبْ ع الڨٓدّادَه
جاهز بلا تلحينْ منّي ولادَه
يا امّ العيون السّود يا ولاّدَه

انتِ سْبٓايِبْ سٓعْدِي
وانتِ الْجٓنّٓه والنّعيمْ بْوٓعْدِي
اسمكْ كما المشموم نوّر زندي
ومحبّتكْ وسط الحشا وٓڨّٓادَه
نهديكْ يا عطر الرّبيع الوردي
جفـني فْ عزّ النّوم وڨْتْ رڨٓادَه

ونهديك رقم صعيبْ ع العدّادَه
وسرج الفرس بذخيرتَه وزنادَه
يا امّ الصّدر حنين يا ولاّدَه

يا مغرّڨتني فْ خيركْ
يا معيّشتني فْ جنّتكْ وخميركْ
مُوحٓالْ نعشڨْ في المحافل غيركْ
يٓا سٓــاهرَه وكلّ الْعُيُونْ رْڨٓادَه
وڨْت الشّدايدْ ما نسيتي وليدكْ
دمعاتْ عينكْ عِطْرْ عٓ السّجّادَه

نهديكْ حرف يغيب عٓ الصّيّٓادَه
يصعب على الرّدّادَه
جاهز بلا تلحين للنّشّادَه
يا امّ العيون السّود يا ولاّدَه
بقلم : فاروق الجعيدي

قد يعجبك ايضا
تعليقات