قصيد بعنوان (فلسطين حرة)
بقلم حاتم بن حورية
تونس ولاية نابل معتمدية حمام الغزاز
يا غزّة شعبك ثاير….يخمّم حاير..
و اليوم وجد دباير
يزّي مالظّلم العاتي ما عانيت
و يزّي مالحمل الشّاڨي ما ڨاسيت
و يزّي مالدمع الجّاري ما جرّيت
و ڨدّاش حفرت للجثث حفاير
و ڨدّاش من وجع المظلوم هزّيت
و عانيت من ڨهر الظّالم ڨهاير
ڨداش خدمو ضدّك دوَلْ
و ساسهم خايخ فيه حوَلْ
و حاربت جيش فيه غوَلْ
و باڨي وجهك ضاوي ناير
معاك تونس و شعبها الكل
وڨفت معاك و وثارت ضد الغاير
يا فلسطين نحبّوك ديما حرّة
و ع جالك نمشوا في الجرّة
و نتجرعو كاس الحياه بالمرّة
و ع جالك نبنو من الصرح سراير
كيف نذكّر محمّد جمال الدرّة
يركبني غيض و دمّي يغلي فاير
حياني الحي و سمعت بطوفانك
بنيتي صمعتك و شرّعت آذانك
بصواريخ متحمسة بفقدانك
خليتي دول العدو ضراير
و جميع العرب رافعة أعلامك
باهجة فارحة بإلّي صاير
ثوري و شنها على كل من غدر
و في سنين الطوال ذوڨك المر
و طير و علّي من ڨياع الحفر
و ربّي أكّد واعد كل الصّباير
و ڨال صبري على كل من صبر
و نبشّر الصّابر بالصّبر بشاير
ولادك مشهورين ذكورة
و احفادك معروفين نمورة
و فرسانك متعلين صڨورة
بالرّوح و الدّم و ڨوّة الضماير
رافعين راية عالجّبين صورة
و تبڨي غزّة هي أم الحراير
و ياغزّة شعبك ثاير
يخمّم حاير
و اليوم وجد الدباير
بقلم حاتم بن حورية
في 10/10/2023
