عنوان القصيدة ( أنا و قلبي)
بقلم حاتم بن حورية
تونس ولاية نابل معتمدية حمام الغزاز
يا قلبي ماني وصيتك إسمع الكلام
و قتلك خلي أمرك للعقل
تصير مرتاح من الهم و التخمام
و كل المشاكل المخبلة تتحل
تتسرح حرير بالتمام
و كل مشكلة ليها حل
الحلفة ما إطيب كان بالرزام
أضفرها و ردها في مقاس حبل
الهم قد ما يتكدس أكوام
و قد ما يعتال في مثيل جبل
و يصير عملاق بكبر الأحجام
و من بو قرنين على الشعانبي يطل
يجيه نهار ينجلي و يقزام
و يصير تحت الأقدام يتذل
وصيتك ما تخالط الأقزام
قلال الهمة في جود التل
و ديما خالط كبار الأقوام
تنال منهم حكمة و مثل
و باريك من كل خوان و مسمام
و كل من ساسو خايخ فيه حول
الطيور فيها البارك و فيها الحوام
لكن أغلبها طعام صقور مبجل
الحوت الكل في بحرو عوام
و فيه أنواع كثيرة و شتل
لكن على الميزان أسوام
و الكيلو عمرو ما يولي الرطل
