بقلم حاتم بن حورية تونس ولاية نابل معتمدية حمام الأغزاز
يا جاي على حمام الغزاز تتنشد
نسميلك خيراتها من غير حساب
عمركشي ريت ذهب يصدد
لو يبقى سنين تحت التراب
نساها لبوات رزينة تتندد
متربصة مكشرة الأنياب
و رجالها صيودة تتهدد
على كل من في ضنها خاب
تفرح بضيفها تتودد
صريحة مع كل الأحباب
نسميلك مطمورها و نحدد
إنت أسئل و انا عندي الجواب
في ثمارها نغلط كيف نعدد
نحاول و ربي جيبني في الصواب
بتوتها و كرموسها نودك و لا نشهيك
وين تمشي موجودة في كل مكان
بدلاعها و بطيخها و سبولها فريك
تشكب بيهم على طول الميدان
خوخها و مشماشها بالمنظر يزهيك
أحمر و أصفر زاهي الألوان
نحكيلك على بحرها و إلا يزيك
مصنف الرابع بين أجمل البلدان
سلوقي الأهراس يا لزرق إمسميك
قاروسك من بعد يلمع يبان
يا لزرق كسوة رملتك تواتيك
بيضة ناصعة تلمع لمعان
الناس من كل بر تجيك
في صيفك و شتاك و كل الأزمان
يا ناشد باقي نشداتك قلال
إنت أسئل و أنا نجاوب بإلي في بالي
أنا ما نتقلق و نجاوبك بدلال
جربني تلقى قولي مطابق أفعالي
سألتني على الغزاز و الحال
و شنوة يدور بين الأهالي
نجاوبك و راسي مرتاح البال
عليا كان بداري و عزة عيالي
و في السياسة ماني كيال
أسئل غيري عديم الذمة و هات مكيالي
كان جيتني في البداية بصراحة
تلقاني ما نيش من البيوعة
تلقاني صامد نجاوب بوقاحة
و نسميك ضبع الضبوعة
و نزيدك قرجومة فضاحة
نرميك تاكلك السبوعة