ملام و جواب
بقلم_ حاتم بن حورية
لاموني و قالولي كثر ملامك
على الأصحاب جايبهم جموع
قلتلهم
كان صاحبك مرة ذاق طعامك
يصبح مفروض وين يراك يجوع
ملامي على قليل الهمة ماهو للغير
موجه للصاحب الغدار بالتحكير
دخل للدارك القمح و الشعير
أما الفول صوتو يشرقع مسموع
للعديم الذمة ننعت و نشير
نقصلو عروقو و ما لوشي رجوع
ملامي موجه للعديم الذمة
و للقليل الأصل إلي بلاشي همة
لو تردمو بخيراتك و تغمة
باقي ما تشوف منو منفوع
مثيل الحنش يطرشك بسمة
يخليك تلاجى مطيش مصروع
ملامي موجه للي يهز الكلام
و للموهان و الفضايحي النمام
و للخاين و للسر ماهو كتام
و للجيعان و في كرشو ماهو قنوع
من كبدي نقلع عروقو بتمام
يصير مثيل العود بلاشي فروع
ملامي موجه للي ظنيتو حبيب
و ظني في طبعو عمرو ما يخيب
لقيتو غارس فيا نياب الذيب
و خلاني نتقهر مطيش موجوع
نحلف لو يتلمو بيا ألف طبيب
ما ينجمو يردو قلبي المخلوع
ملامي موجه للي ظنيتو ذراعي
و ظنيتو في غريقي سفينتي و شراعي
لقيتو زايد همي و شامت في وجاعي
حالل في الخدود سواقي تجري دموع
مثيل الذيب يترقب في رحيل الراعي
يرتع في كل الشياه بلاشي رتوع
مختصر حديثي جرب قبل ما توالف
ولا تحصل كيفي و تصبح حالف
بالكشي تلقى من طبعك مرادف
يضويلك طريقك من صوابعو شموع
و تزهالك الأيام و تنجلي لمخاوف
و يصير القلب متهني ماهو مفجوع