كل حي في برو يرعب
شعر شعبي/ حاتم بن حورية من حمام الأغزاز نابل
متابعة عبدالله القطاري من تونس
كل حي في برو يرعب
و الصيد يرعب في كل بر
السارق من حثلة يهرب
مدامو يبني ناوي على الشر
كون في حياتك رجال
وإكسب قيمتك بدلال
و جيب رزقك بالحلال
تكسب ثيقة كل من حضر
و لا تخلي روحك موسال
و توحل في جميع الحفر
كون فحل صاحب ثيقة
و الغدار لا من يطيقه
و كون فعال عند الضيقة
و لا تجني من الحلو مر
و تبع الخير و طريقه
تمنع في يوم الشدة و الحر
تمنع في يوم الشدايد
و افعالك عليك شهايد
موسمة على صدرك قلايد
تفوز بيها على كل لبشر
يبان بين الصحيح و البايد
و يا ويل كل من وزر
و في كلامك خمم و قيس
و أرمي ميزانك و غيص
ولا اتبع خطوة إبليس
و كل خطوة تتقاس بالشبر
و مع خطاويه تصير خسيس
و ما ترمي لومك على القدر
و لا تقول راني مسير
و في العالم شي يحير
راك في حياتك مخير
بين المذاهب و إنت حر
كلام الله ما يتغير
و إلي جاب العكس كفر
كل شي في حياتك مقدر
وكل قدر عند الله مسطر
لكن لازم عليك حدودك تأطر
و ما تبالغ و تخرج عالسطر
كل من حامل ضيم لازم يقطر
و يرجعلو على الصحة و النظر
باريك من السو و السية
و جالس الناس بحسن النية
و لا تعفس رزق الغير بالكية
تصبح واحل بين أنياب الخطر
رزقك راهو جاي في الثنية
و تصير عبرة لمن يعتبر
جاهد و حاسب حسابك
و خوذ من الدنيا عز منابك
و وصل الرحمة للي جابك
و ما تكون جامد صمة حجر
راك وحدك تقاسي عذابك
و تكون وحيد في ظلمة القبر
بقلم حاتم بن حورية
في 2023/8/05