وجيعة

شعر شعبي/منيرة الحاج يوسف من جربة جزيرة الأحلام
متابعة عبدالله القطاري من تونس

يلي شادين الكرسي راهي غبينة
يا عاركم
من خالقي يا ناركم
لا ما ولا ضو لا فرينة
الخضرا بلادنا نحبوها وبارواحنا نفدوها
غالية تونسنا
وهيبتها عزيزة علينا
ملا حالة
كيفاش بعد العز
يرعى البق والنخالة
الكلاب سرحوا فيها
تهبهيبهم في الريف
ووصل للمدينة
الاحرار موجوعين ملعوج والنذالة
عيشة الرخص و الذل ما هي لينا
نتكلموا على حقوقنا يزينا
من ظلم هالفساد طلعت روحنا فدينا
لا ماء لا ضو لا فرينة
لا سميد لا حليب لا مسؤول يلهى بينا
من الفقد و الغلا تكوينا
الفوضى يا بلادي عمّت
عبثت بينا
كأنا في غابة
ولا حد داري بينا
شن هالحالة
وينا النظام وينها العدالة
وينا القانون، يحكم فينا
والدمعة جرّحت عينينا
يا مسلمين الله
يا حكامنا
يا كبارنا
يا مسؤولين علينا
نغصّتولنا عيشتنا
الجوع،جوعتونا و الفقر فقّرتونا
لكننا احرار ما نمدو يدينا
بظلمكم
عيشتنا سوّدتوها
ولات كحلا شينة
وتونسنا من افعالكم حزينة
لا ما لا ضو لا فرينة