ذا ريتْ
شعر شعبي/ابتسام الخميري من سوسة
متابعة عبدالله القطاري من تونس
إذا ريتْ علَى شْفايفي الْبَسْماتْ
مِدْ كْفوفِكْ و امْسَحْ الدّمعاتْ
الدّهرْ سنينو كُلّها موجاتْ
و نا طْبيعْتي ما نِعْشِقْ الآهاتْ
أمّا هذي سُنّة…
إذا ريتني فَرحانهْ
ولقيتني فْحالِةْ زاهيَ ولْهانَهْ
ماشْطَه السّوالف لابْسَه مِزْيانه
يِبانْ لَكْ جَمالي آيَة
مثل الْقَمرَ ضَوّايَه
ويَسْرَحْ خيالَكْ فيَّ وِتْجَسِّدْني
أميرةْ هواك تباتْ مِتْوَسِّدْني
ونقولّك ابْعِدْني…
نْطَوِّلْ مْعاكْ الطُّرَحْ وِتْعانِدْني
أيّاك لا تَبْغَضْنِ ولا تِحْسدْني
فِي الْقلبْ راني مْنَكّْدَه وَحْزينه
نَحْمَلْ هْمومْ دْفينَه
لكِنْ بْكُلْ عَزيمَه
نَرْفَعْ الثِّقْل وضيمَه
وقُدّامْ ناسي نْظَهِّرْ التّبْسيمَه
أمّي وَصّتني: “لازمْ نِكون عْظيمهْ”
كُلْ فَرَحْ كِ نِمْشيلَه
نلبس حْرامْ الزّهو والتِّخْليلهْ
و الخُرُصْ وِالتِّكْليلَة
تْبانْ صورتي صورِةْ أميرِةْ عيلَة
عيبْ لْمْرا لَبَيِّنِتْ دَمْعِتْها…
يِطْفي الهوى شَمْعِتْها
تِهِتَزْ ما بينْ النّْساء صورِتْها
كْلامْ فِلْحَليبْ رْضَعتو
شْربْتو كْبِرْت عَليهْ ما تْصَنَّعْتو
سْنين عُمري عدّتْ
و نا صابْرَهْ و نا حامْلَهْ
… و نا ضاحْكَهْ و مُوضامهْ
لا قابِلهْ لْإهانهْ
في الحقْ لا اِنْدَنْكِسْ ولا حَشّامَة
يا ما مْصايِبْ ريتها وتْعدَّتْ
ويا ما رْجالْ تْهدَّتْ
و لا إيدْ طالِتْ لاعَليَّ تْمدَّتْ
و لا دْروبْ في دْروبْ الحَياةْ تْسَدَّتْ
و لا يومْ رِجْلي علَ المْضارِبْ شَدِّتْ
روحي فَدِّتْ
لِلزّهى طَوّاقَه
لْهَمْسِةْ هَوى مُشْتاقَهْ
مْعَ مِنْ يِحِبَّه خاطري نِتْلاقى
و لِشْويَّتْ رومانسيّهْ ذوّاقه.
إبتسام عبد الرحمن الخميري