تكاية ع الماشي ما أسباب ميل الكيكة ؟
رانيا فتحي عواد
الكيكة بتطلع مايلة أو جنب أعلى من جنب مشكلة متكررة وبتحير ناس كتير
فى اسباب مختلفة للمشكلة دى هنحاول نقول أهمها…
١ – عدم خلط المواد الجافة بشكل جيد بيخللى توزيع مادة الرفع (البكنج باودر) مش مظبوط وبيكون متركز بشكل عالى فى أماكن وبشكل أقل فى أماكن تانيه.
٢ – لما بندهن أرضية وجوانب الصينية بالمادة الدهنية والدقيق لمنع الالتصاق أحياناً بيكون فى جنب مش مدهون كويس وده بيخللى الكيك يرتفع أسرع فى الجنب المدهون و يلاقى مقاومة فى الارتفاع فى الجنب اللى مش مدهون كويس.
٣- بعض الأفران بيكون توزيع الحرارة فيها مش مظبوط فابيكون فيها جنب حرارته أعلى من الجنب التانى وده بيخللى جزء من الكيك يستوى ويرتفع بشكل أسرع من الجنب التانى.
٤- ناس كتير مابتاخدش بالها وبتحط رف الشبكة بتاع الفرن ((مقلوب)) وده بيخللى عمدان الربط المعدنية اللى فى الرف من تحت تبقى زى المطبات تحت الصينية وتخليها مايلة.
دى تقريباً من أهم الأسباب اللى بتخللى الكيك يطلع معانا له جانب أعلى من الجانب الاخر