النصاب والطماع وأنا
بقلم / محمد حسني
النهارده هتكلم بالعامية المصرية خلال الفترة السابقه ظهرت كتير من حالات النصب بشكل جميل زمان العتبه الخضرا اتباعت وبرج إيڤل اتباع وكله بالنصب والفهلوة دلوقتي النصب بقى شكله حلو ومغري جدًا دلوقتي عندنا المستريح وعندنا ابن عمي شغال في الهيئة الفلانية وهات عشرين ألف جنيه واشغلك في وظيفه محترمة وعندنا مشروع السراب لكل مرتاح ادفع وانسى فلوسك وعيش معانا عيشة المليونير الوهمي واجري ورا أحلامك وأوهامك بس بفضل الله عندنا الأحدث أبو تكنولوجيا وخدمة عملاء وواحد ببدلة وعربية شيك بيعمل محاضرةمحترمة وأنت بس هتدفع معانا 50 دولار وهيجيلك في اليوم فلوس حلوه بص انت هتأجر بس سيرڤر معانا علي الموقع وده بيعمل تعدين لعملة اسمها البيت كوين ودي عملة الواحدة منها بأرقام فلكية فتخيل بقى لما تدفع أكتر تكسب أكتر وهات ابن عمك وصاحبك واخد قرض وبيع دهب الحاجة والدتك ما أنت هتبقى من أصحاب الملايين وتخيل نفسك معايا وانت في عربيتك بتشرب قهوتك.
للأسف إحنا كسلنا نشتغل وكسلنا نكسب بالحلال وصح وبقينا مطمع لكل نصاب بقى فيه برامج للتعارف شباب تدفع لشحن البرنامج وبنات وسيدات ولشدة أسفي بتعرض نفسها وجسدها بكل رخص عشان بس أرباح البرنامج إحنا بعدنا عن العرف والدين ،الحرام سهل ورخيص جدا، والحلال صعب أنا دخلت أحد البرامج للتعارف ولشده أسفي من كم المهازل وحضرت العديد من المحاضرات للنصب وهات اتنين تحتك ونعمل شجرة وليك نسبه محترمة إحنا مشكلتنا مبقتش مخدرات وإرهاب مشكلتنا بقت أكبر واعمق مشكلتنا بقت تربية وضعف نفوس وللأسف صعب أنزل بصور الإثبات لكلامي ولا أقدر انزل بأسماء البرامج أو الشركات وده عشان ضعاف النفوس مبقاش أنا مدخلهم لعالم لا يعلمه إلا الله ياريت كل أب وأم وأخ يتابعوا بناتهم الدعارة الإلكترونية مش محتاجة الخروج من باب الأوضه بتحتاج بس النزول لسحب الأرباح فانتبهوا واحزروا.
