القاهرية
العالم بين يديك
Index Banner – 300×600

الأوانى السيراميك والجيرانيت إزاى نقدر نفرق بين الأصلى واللى عامل نفسه أصلى

104

رانيا فتحي عواد

مبدئيا فى معلومة وقاعدة عامة لازم نكون كلنا عارفينها وهى إن كل الأوانى المطلية بطبقة مانعة للإلتصاق “non stick ” الجسم بتاعها بالكامل بيكون مصنوع من الألومنيوم.
ويجى بعد كده المصنع يضيف عليها (طبقة مانعة للإلتصاق)
الطبقة دى بقى ممكن تبقى من ال (تيفلون أو السيراميك أو الجيرانيت وهنسيب القوس مفتوح لأنهم لسه بيخترعوا فى حاجات تانى جديده ….
الأخ تيفلون ده بقى (الطبقة السوداء اللى اشهر ماركاتها تيفال)
واللى بيرمز لإسمه على المنتج برمز PTFE اختصارا ل
“Polytetrafluoroethylene
ده كان أشهرهم وهو اللى كان منتشر ومسيطر لغاية ما ظهرت الموضات الجديدة دى ، ومن ساعتها والإقبال عليه قل واتركن يا عينى على الرف .
تقوم تعمل اية الشركات المصنعة ليه بقى عشان ترجع تبيع تانى ؟
ترش طبقة ملونه حرارية فوق طبقة التفلون (كل الألوان اللى تخطر على بالك) عشان يبقى شكله حلو كده وجميل ويبتدى الجمهور يقبل عليه من تانى
والحقيقة إن الشركات دى كان فى منها نوعين…
نوع واضح وصريح وبيقولك ده مجرد لون عادى والوعاء نفسه تيفلون
ونوع تانى عملك طبقة فوق التفلون شبة السيراميك أو طبقة شبة الجيرانيت وسابك لضميرك بقى
بس إن جينا للحق هو الصراحة ما بيضحكش عليك وبيكتبلك على المنتج عبارة من دول …
PTFE INSIDE
PTFE COATING
يعنى بيقولك ده تيفلون مطلى أو تحت اللون فى تفلون ، بس طبعا هو عارف إنك مش هتفهم حاجة من الرموز والكلام ده ، وده لو أساساً حد فينا قراء

أما الأوانى السيراميك والجيرانيت الأصلية تحتوي على إحدى هذه العبارات:
CERAMIC COATING
GRANITE COATING
ECOLON COATING
وده بيقولك وش كده دى طبقة سيراميك أو جيرانيت

وبكدة الإختيار بالنسبة لك هيبقى أسهل وأسرع بس إصبر بس

فى حاجة مهمة لازم تاخد بالك منها وإنت بتشترى اوانى التفلون (التيفال) تحديداً سواء بلونها الأسود الطبيعي أو الملونة أو بأى شكل آخر.
فى مادة كانت بتدخل فى تصنيعها إسمها
“Perfluorooctanoic acid”
وبيرمز إليها بالرمز PFOA
المادة دى كانت عاملة قلق ، وهى اللى كانت مسببة لكتير من الأمراض وعلى رأسها السرطان والعياذ بالله.
لكن من بعد 2013 حصل تطور فى تكنولوجيا التصنيع واستغنوا عنها ومابقتش من ضمن مكونات التفلون
وطبعاً بما إن التكنولوجيا الحديثة أكثر كلفة فاللى طبقتها بالمواصفات دى هى الشركات اللى ليها إسم كبير وسمعة طيبة وبتهتم بمواصفات الجودة العالمية.
أما معظم المصنعين (خاصة المنتجات ذات الجودة الرديئة المستوردة من الصين) شغالة على قديمو بال PFOA

عشان كده مهم جدااااا وإحنا بنشترى اى وعاء مطلى بمادة التفلون يكون عليه رمز يدل على خلوه تماماً من مادة PFOA

قد يعجبك ايضا
تعليقات