القاهرية
العالم بين يديك
Index Banner – 300×600

خبز الڨوجٓه

97

للشاعر الشعبي الغنائي/فاروق الجعيدي من تونس
متابعة عبدالله القطاري من تونس

طلّينا على زعفرانٓه
ريحٓه
ضربتني ..جِلْبتني
سحرتني ياسر مزيانٓه
ريحة يمّٓه
ريحة خالٓه ريحةْ عمّٓه
ريحة دادٓه ..ريحة لٓلّٓه
وسٓامُور مْتٓوِّڨْ دُخّانٓه
زعمٓه شنوّه ؟
هذي ريحة زعتر والاّ
ريحة غلّه !
والاّ من شعرها الّي تدلّى !
طفلٓه في يديها مثنانٓه
ڨمره في طريڨ التّبّانٓه
ريحة فُلّٓه !
والاّ مِسْكْ اللِّيلْ بْكُلّه !
تحمش في الڨوجٓه تعبانٓه
جٓــرْدٓاڨٓه تْغٓـنّـي فرحانٓه…!!!

طفلٓه صغيرٓه
تحمي في الڨوجٓه
تصويرٓه
سِرڨتْ ڨلبي سلّه بسلّه
صار عڨلي مذهوبْ الشّيرٓه
زعمٓه شنوّه ؟
هذي ريحة عنبر والاّ
ريحة فلّه !
تْشٓرّعْ سيف هْدٓبْها تسِلّٓه
وڨلبي
تنوِي على ڨتلانٓه !

ڨٓرِّبْتْ مْنِ السّمحٓه الزّينٓه
خُزرتْ لِينٓا
نٓا وحصاني تْثٓبّتْ فينا
ومن تحت الحاجب نحّار
رمتْني بالسّهمِ الغدّارْ
عينيها
تجرح سكّينٓه…!!!

ريحٓه بنينٓه..!
يديها على الطّابونٓه حنينٓه
زعمٓه شنوّه ؟
هذي ريحة خبز الڨوجٓه !
ريحة كٓرْمُوسْ الْڨٓرْطلّٓه !
والاّ نار حطبْ وجٓلّٓه !
والاّ مْنِ شْعٓرها كِي تحلّٓه !
يفُوحْ على خْدُود الرُّمّانٓه !

نزلتْ على حصاني
ڨْرُبْتلها…
وڨلتْ اسمٓ اللّٓه
تبسّمتلها…
نويتْ على شريبٓه مِ الڨُلّٓه
ويا ما شالله !
على بدر تحجّبْ وتعلّى !
ڨلت نلاغيها.. نكلّمها
ريت الخاتم
ريت الْفٓرْدٓه على معصمها
حلُوّٓه عينيها… ما اظلمـها !!!
طفلٓه غشّيرٓه.. بخْشمْها
خٓزرتْ..
ڨِحرتْ لي ..ما ازعمْها !
ونٓا نِفْهِمْهٓا..
وڨالتْ لي تعدّى هٓا شاعرْ
ما تڨرّبلي طبعي واعر !
خُبزاتي
نِجْمٓاتْ الڨُوجٓه
شْهٓدْ مْعٓتّڨ وسْطْ بْرُوجٓه
والْڨُرْصٓه
بنت الطّابونٓه
ماهيشِي كيف خبز الكوشٓه
برّا تعدّى
عليكْ سخونٓه
لٓا تتڨرمشْ لآهِي هْشُوشٓه
خُبْــــــزٓه
ماهيشي فٓنْكُوشٓه
آشْ لـزّكْ جايْ تكلّمها ؟
تحلمْ تتشهّى مطعمها
تٓنْسٓى ڨٓصْركْ
تنسى رْخٓامِاتٓه ودْرُوجٓه
عاشڨ في خُبْزٓاتْ الڨُوجٓه
في برّ جدودكْ ومروجٓه
ترحــلْ .. وتوطّـنْ بحـذانٓه..!!!

طلّيتْ على زعفرانٓه
ريحٓه
لفحتني.. جِلْبتني
شدّتني ياسر مزيانٓه
ريحة يمّٓه
ريحةْ خِالٓه ريحةْ عمّٓه
ريحةْ دادٓه ..ريحةْ لٓلّٓه
وسامور يعجعج دُخّانٓه
زعمٓه شنوّه ؟
هذي ريحة زعتر والاّ
ريحة غلّه !
والاّ من شعرها الّي تدلّى !
طفلٓه في يديها مثنانٓه
ڨمره في طريڨ التّبّانٓه
ريحة فُلّٓه !
والاّ مِسْك اللِّيلْ بْكُلّه !
تحمش في الڨوجٓه تعبانٓه
جـرداڨٓـه تغٓـنّـي فرحان بقلم : فاروق الجعيدي

قد يعجبك ايضا
تعليقات