ازاى نعالج ببساطة الدم اللى فى الفراخ اللى بنلاقيه و إحنا بناكل

رانيا فتحي
المنظر ده بيدايق ناس كتير خاصة كمان لما نكون غاسلين الفراخ ومنضفيهنا كويس جدا ونلاقى دم (على حد تعبيرنا ) بالشكل ده وإحنا بناكل
عاوزين تعرفوا إيه السبب فى الموضوع ده ؟ وازاى نعالجه
الفراخ اللى بنشتريها من عند اى فرارجى بتكون جاية من مزارع التسمين مش فراخ متربية بشكل طبيعى أو زى ما بنقول (بيتى) أو اورجانيك.
– طيب وإيه الفرق يعنى … ؟؟

ببساطة الفرخة اللى بتتربى فى المزارع بيبقى حجمها أكبر من سنها الحقيقي
بمعنى إن الفرخة بتوصل لوزن كبير وتبقى مليانه بروتين (لحم) فى عمر من ٦ الى ٨ أسابيع فقط ، لكن لسه ماوصلتش للنمو الكامل فى باقى مكونات الجسم ، وده بيكون طبعاً بسبب نوعيات الأعلاف المركزة اللى بيتغذى عليها الدجاج ده ، وكمان أنواع السلالات بتاعته اللى بتكون مخصصة لغرض التسمين السريع
وتركيبة عظام الدجاج فى السن ده بتكون مجوفة ورقيقه ومسامية يعنى بتسمح بخروج النخاع منها أثناء عملية الطهي
لأن النخاع بيكون لسه ما وصلش لمرحلة التكلس (الصلابة) الكامله اللى موجود عند الدجاج الأكبر سناً
فبتكون النتيجة إنه يخرج من جوة العظم المسامى الضعيف ده ويتخزن مابين العضم والعضل (اللحم) اللى بيكسو العضم ده.
– إيه ده ! يعنى ده مش دم؟
= لاء مش دم خالص ، الدم بيستنزف تماماً أثناء عملية الذبح
– طيب هو كده يبقى ضار لو اكلناه؟
= لاء خالص دة مكون غذائي وكمان مطهو ، لكن الموضوع بيكون نفسى أكتر.
– طيب ممكن نعمل إيه عشان نتخلص من الموضوع ده ؟
عندك حل من اتنين …
الأول إننا نخلى الدجاج او تشتريها مخلية من العظم وتبعد عن اى احتمالية لظهور نخاع العظام الغير محبب ده فى الأكل
الثانى هو إنك تغير الوسط الحامضى بتاع اللحم نفسه ال PH وتخليه أكثر حامضية عن طريق تتبيل الدجاج وإضافة الخل أو الليمون أو الاثنان وده هيقلل بنسبة كبيرة من ظهور اللون الأحمر ده فى اللحم
نصيحة هامة جدا …
لما نخرّج الدجاج من الفريز نسيبه يفك تماماً جوه التلاجة ، ولازم “تماماً” دى .. عشان تصفى اى سوائل غير مستحبة سواء نتيجة لتكسر بعض الخلايا البروتينية نتيجة التجميد أو لنخاع العظام وماتفضلش محبوسة داخل اللحم وتظهر وبعد كده فى صورة قطع لحم بنى أو سوداء أو حمراء غير مستحبة.
وبكده نكون عرفنا إزاى نحافظ على الطبق بتاعنا بشكل جميل ومحبب إلى النفس