تحت التــوتـــه
بقلم _ مايسة إمام
تحت التوته في حضن البيت
في قلب الأرض وخضر الغيط
جنب الزير والكوز والقلة
ياما حكينا هنا حواديت
قاعدة بمني نفسي واقول
ياللي حشاي كان لكوا بيت
سيبوا مكاني ارقد فيه
والمحكم في نهار ومبيت
سيبوا المصطبة سيبوا حصيرتي
تحضنكم في أوقات العيط
ادفنوني هنا وسطيكم
عاوزة احس دبيب رجليكم
فوق راسي يعدي ويفوت
وأصواتكم تطمن قلبي
وانا وحدي وكفني مربوط
تحت التوته في حضن البيت
عاوزة أشوف ضحكة أيامكم
عاوزة امسح دمعة أحزانكم
عاوزة أعيش تفاصيل مشاكلكم
وأبقى عايشة وأنا مش عايشة
المهم أحس وجودكم
مش عاوزة أكون وحدي بعيد
يكفى القبر ظلامه شديد
يكفي لساني خلاص معقود
مش هقدر إني اكلمكم
عاوزة الفاتحة تنادي علي
تيجي تصبح كل شروق
ونسمة طرية بدعوة تجيني
كل مسا أصحى وأفوق
مش عاوزة غير نبض قلوبكم
يبقى فاكرني وقت اللمه
وعيالكم تلعب فوق قبري
وتنادي ياجدة وانا اسمعهم
ويرد ترابي على نداهم
والروح تترد بأصواتهم.
عاوز اتباهي بزرعة عمري
وطرحها الأخضر في لمتكم
وملايكة تقولي محلاكي
ومحلى الزرعة دي بسببكم
فاكرينك دايما بالخير و الدعوة ترن
فتسعدكم
تحت التوته في حضن البيت
ادفنوني علشان أشوفكم.
رئيس مجلس إدارة جريدة القاهرية