عرق رستو (اللحمة الباردة)

رانيا فتحي

عباره عن عرق تربيانكوا بيتجاب من الجزار بيبقى وزنه من اتنين الى تلاته كيلو وبتخلى الجزار يلفهولك بالدوبارة للمحافظه على شكله الاسطوانى اثناء الطهى ..

وبعدين هانمسحه كويس بالمناديل عشان ننشفه من السوائل وبعدين نعمل فيه ثقوب ببوز السكينه من كل حته وتكون عميقه وبحجم تخن الصباع الصغير وده لاننا هانحشيها فلفل اسود حب وتوم صحيح وتكون الفصوص حجمها وسط

وبعد حشوه كله من جميع الجهات بالفلفل الصحيح والتوم ندعكه بالملح مع زيت عشان الملح يلزق عليه ونكون مجهزين صينيه مستطيله فيها سمنه على زيت ونشوح العرق على النار يادوب ياخد لون من كل الاتجاهات مش أكتر واحنا كده بنعمله صدمه عشان يقفل على السوائل اللى فيه ويحتفظ بطراوته

وبعد تشويحه فى نفس الصينيه والسمنه ننزل عليهم بكرفس مقطع كبير وبصل اربع تربع وجزر مكعبات كبيرة ونغطيه بورق فويل ونضيف كوبايه مايه للصينيه اونص كوبايه على حسب الحاجه ووزن العرق ونحطه فى فرن درجه حرارته 200 درجه مئويه وبياخد حوالى ساعه ونص لساعتين على حسب وزنه يعنى لو وزنه اتنين كيلو يبقى ساعه ونص ولو وزنه تلاته كيلو يبقى ساعتين وفى اخر نص ساعه يرفع الفويل عشان ياخد لون دهبى من فوق

بيتم التأكد من استواءه بوضع خلة اسنان خشب فيه وعمل ثقب لو طلع السائل لونه احمر يبقى لسه محتاج سوا تانى لو طلع السائل من الثقب شفاف شبه الشوربة كده معناه انه استوا ويتم اخراجه من الفرن ويترك ليبرد تماماااا

وبعدها يتم قص خيط الدبارة من عليه وتقطيعه لشرائح رفيعه ويستحسن يترك ليله فى التلاجه حتى يتماسك وتقدروا تتحكموا فيه

بيبقى حلو جدا لسندوتشات الاولاد او الرحلات

بعد ماناخد العرق والخضار من الصينيه هتلاقوا فيها سائل تصفوا كويس وبعدين تحطوه فى نفس الصينيه على النار لحد ماييبقى كثيف مع معلقتين دقيق ويتقلبوا كويس وممكن نضيف معاه معلقة ديمجلاس باودر ويتساب على النار لحد مايتقل ويبقى زى صوص البشاميل مع تظبيط الملح والفلفل وده بقى يا جماعه اسمه (الصوص البنى) اللى بيتاكل مع شرائح اللحمه وبالهناوالشفا..

ملحوظه :- تقدروا تستهلكوا نص العرق بس والباقى تلفوه فى ورق فويل ويحفظ فى الفريزر ويستخدم عندالحاجه وبكده يبقى اقتصادى جدل