القاهرية
العالم بين يديك
Index Banner – 300×600

ليه اللحمة بتنشف فى الشوى؟

99
رانيا فتحى
اللحمة بتنشف فى الشوى ومش بتستوى كويس وبتشد ومش بتطلع زى اللى بناكلها بره
اهم حاجة في الشوي …
⁦أولا .. نوع اللحمة اللى هنشويها (أحسن قطع الفلتو أو الريش والانتركوت وعموما منطقة الضهر والرقبة ممتازة مفروم للكفتة) وتقطيعتة اللحمة (تكون رقيقه ورفيعه)
⁦ثانيا .. يكون الفحم سخن ومشتعل كويس ومتوزع فى قاع الشواية بشكل منتظم عشان توزيع الحرارة على اللحم يكون مظبوط
⁦⁩ثالثا .. اللحمة ماتتقلبش كتير واحنا بنسويها … يعني حوالي ١٠ دقايق على الأكثر على كل اتجاة .
▪️رابعاً .. التتبيلة بتاعتنا لو عاوزينها زى برة تبقى الاتى:
١- عصير مية بصل ونصفيها فى مصفى ديقة تماماً من التفل عشان ده اللى بيشيط ويتحرق على سطح اللحمة ويدينا إحساس انها استوت وهى لسه قلبها نىّ.
٢- طماطم مبشورة مش معصورة.
٣- ملح وفلفل وبس كده (فى الكباب يفضل وضع الملح مع شوية من عصير البصل وتضاف على اللحمة قبل الشواء مباشرة)
مدة التتبيل من ساعة الى ٣ ساعات ولو كباب أو ريش ضانى من نص ساعة لساعة وطبعا داخل التلاجة.
ممكن نزود معلقة صغيرة سكر عشان تدينا لون حلو وطعم مسكر.
ولو اللحمة كبيرة فى السن ممكن نضيف معلقة صغيرة بيكربوناتو.
ولو ريحة الضانى جامدة نضيف معلقة خل.
ودى نوعيات مختلفه لقطعيات اللحوم وإستخدامتها الأنسب ..
الشوى على الفحم : الريش – بيت الكلاوى – عرق الفليتو
الشوى فى الفرن : الريش – الكتف
الاسكالوب : الانتركوت – ووش الفخدة – البتلو
مع الخضار والسلق : وش الفخدة – الموزة – كولاتة
اللحمة الباردة : عرق التربيانكو
شوربة : الرقبة
الستيك : الانتركوت اللى هو جوه بيت الكلاوى وهبرة البطن المهم تتقطع رفيع
كباب الحلة : الكتف – والموزة الخلفية
طواجن: يعنى كوارع وموز والعكاوى
المفروم : الرقبة ممتازة فيها اعلى نسبة دهون وتنفع للبرجر والكفتة جدا وكمان هبرة البطن وظهر الفخدة ينفعوا مفروم
الشاورما : من وش أو ظهر الفخدة
قد تكون صورة ‏سوفلاكي‏
قد يعجبك ايضا
تعليقات