كتبته د/رانده شحاته
عند أم ترتر ……. يا ترى ايه اصل حكايه ام ترتر؟؟؟؟
نفوسه الشهيره ب “أم ترتر” كانت ساكنه فى حوارى الحضرة ومعروف عنها أنها ست لسانها طويل ومفتريه وماشيه على مبدأ فى الحارة: “الشرشوحه ست جيرانها” ..
أم ترتر مخلفتش( ترتر ) بس عندها اسماعيل وابراهيم ونبويه
” ترتر ” ده اسم شهره لأنها كانت عايقه في نفسها و بتلبس جلاليب ومناديل بترتر عشان كدا سموها أم ترتر وجوزها يبقى المعلم علوان أبو اسماعيل “عربجى حنطور “..
أم ترتر كانت ست بيت شاطرة ساكنه فى بيت دور واحد منه بيت وعربخانه لحصان وعربيه المعلم علوان اما البيوت اللى حواليها دورين وثلاته و كانت عامله فوق السطح بتاع بيتها مزرعة فراخ وبط وكلهم “برابر ” مافيش ولا ديك ولا دكر بط .. و سايباهم سارحين ع السطح يلاغو فى ديوك ودكور بط الجيران اللي كانوا بينطوا على سطح أم ترتر والديك اللى ينط أو دكر البط على سطح أم ترتر مفقوووودددددد
وعلى طول يبقى اجدع عشوة للمعلم علوان!! وكانت خبرة فى اخفاء اثر الديك من ريش وخلافه و الست اللى كانت يضيع لها ديك وتسأل الجيران يردوا عليها بصوت واطى “عند أم ترتر ” يعني ربنا يعوض عليكى” عشان أم ترتر لو سمعت تخلى فرده الشبشب اعلى منهم مش بقولكوا كانت قويه و مفتريه كانت ريا وسكينه الفراخ ..
■وطلع المثل الشعبى “عند أم ترتر” يدل على أستحاله أنك تلاقى اللى بتدور عليه رغم أنك عارف ومتأكد مين اللى خده
![](https://i0.wp.com/alqahria.com/wp-content/uploads/2024/09/IMG_3507.jpg?resize=100%2C100&ssl=1)
رئيس مجلس إدارة جريدة القاهرية