حصري وعاجل
شعر / عادل التعلب
جالنا ياخــــــــــلق بيان للتو
مش عن حالة أرض وجـــو
ومالوش أي مساس بسياسه
ولا بترول ودهب أو ساسه
ولا عن حادثة ولا عن كارثة
ولا عن مركب مالهاش مرسي
ولا هو رياضة صلاح والحضري
لكن جالنا الخبر الحصري
تحت جناح الطير الزاجل
حصري وعاجل
أول قلب معانا اتمـــــرمت
كان ف حبال الهوا متشعبط
كان علشان اللي بيعشقها
ممكن حتي ف روحه يفرط
كان بيعيش أيامه عشانها
عمره ما حد حدود أو خطط
كان بيلم ساعات الفرحة
قبل الحزن عليه ما يخبط
مهما بتعمل فيه الدنيا
عمره عليها ف يوم ما اتشرط
كان متمسك لأ متماسك
وف محراب الحب الناسك
كل فروض الحب عشانها
كانت بالنسباله مناسك
عمره ما فكر يوم يخدعها
عمره ما خانها ف يوم ولا باعها
كانت هيه الدنيا ف عينه
كان العهد ما بينها وبينه
كلمة راجل
حصري وعاجل
أما القلب التاني معانا
تسمع عنه حكاوي تاريخ
ماتحسوش عايش وسطينا
كانه دا نازل م المريخ
عامل نفسه انه فلانتينو
باقي العالم كله طبيخ
قلبك مانجه بيعشق واحدة
لكن قلبه ياناس بطيخ
فاكر ريحته مسك وعنبر
قرب منه تشم فسيخ
دا من كتر عمايله السودا
وانا مش قصدي كمان توبيخ
مش هايلاقي حد يحبه
يمكن روحه تخاصم قلبه
هايعيش كل حياتي ف لمه
بس آخرها هايبقا لوحده
كل هايبعد عنه يسيبه
حتي حبيبه هايرضي ببعده
واللي بيزرع زرعه بيجني
كل ثمارها من فوق أرضه
حتي ولو يزرعها مراجل
حصري وعاجل
آخر قلب شهيد الطيبة
أيوة انا عارف إنها خيبة
مهما حاولنا كتير نوصفها
عمرها برضوا ما تصبح عيبة
دا اللي بنوصفه علي نياته
كل حياته قصة عجيبة
أبيض قلبه عمره ما يحقد
كدا من مهده لحد الشيبة
وان يوم حس بحب وحن
مليون إنا جوابها الغيبة
أيوة براءة طفل ف جسم
واحد كهل في صورة مهيبة
اكتر صنف الناس بتشوفه
لكن عمرها بيه ما بتقبل
صاحب الطيبة يا ناس ف زمان
يتقال عنه بان دا أهبل
يعني عليه الناس تتسلي
قالوا عليه ف بلادنا ..مخبل
ولا له حاضر ولا له ماضي
حتي مالهش كمان مستقبل
أمله وحلمه في سجن
الآجل
حصري وعاجل