القاهرية
العالم بين يديك
Index Banner – 300×600

بر الوالدين واعتذار ابن لأبيه لعدم حضور عيد ميلاده

168

كتب د _ عيد على

استوقفتني رسالة ابن بار بوالديه وهو يعاتب نفسه لعدم حضوره عيد ميلاد ابيه هذا للابن هو رئيس اتحاد الطلاب في إحدى الجامعات نموذجا افتقدناه كثير وللأمانة تم نقلها كما هي ولكن قبل نقل الرسالة
تتقدم جريدة القاهرية ومجلس إدارتها بخالص التهاني للأستاذ ممدوح محمد بمناسبة عيد ميلاده متمنين له أعواما مديدة وعملا مقبولا محققا كل أماله وأحلامه وعقبال العيد المائة
والآن مع الرسالة على حد قول أحمد ممدوح

” معلش نمت وهما بيحتفلو بعيد ميلادك ومنها لله الامتحانات فحابب أوثق حبي ليك ببعض كلام ميوفيش أي حاجة عملتها لينا كلنا
حابب اشكرك علي كل لحظة كنت بتزعق فيا عشان عامل على مصلحتي
حابب اشكرك إنك عديت معايا مرحلة الأب والابن وبقينا أصحاب فعلا
حابب اشكرك أن كل يوم بتتقبل صراحتي اللي ممكن تكون قاسية أحيانا بل بالعكس بتعلمني إزاي أكون حنين وأنا بنصح لبكره بعده
حابب أشكرك ع كل قرش وفرته عشان تساعدنا في حياتنا
حابب اشكرك ع كل طوبه رفعتها ب ايديك وكل مسمار دقيته ف البيت وصلحت حاجات كتير خربناها انا واخواتي
حابب اشكرك ع انك مفكرتش لحظه ف نفسك وكل عمرك لينا
حابب اشكرك على حاجات كتير والله والبوست ده مش هيكفي ولا حتى ١٠٠ كتاب لان ممكن يخوني عقلي وينسى فضل واحد ليك علينا والفضل ده يتقال فيه كلام كتير
انت أعظم اب شوفته مش عشان انت بابا لا ، لأن كل اللي بتعمله لينا وللناس اكبر دليل انك عرفت تزرع فينا اننا نكون حواليك ومع بعض مهما حصل وحب الناس ليك اكبر دليل
استحملتني وانا بتخانق وكل يوم بمشكلة شكل ف اعدادي وثانوي ، واستحملتني وانا بدخن لحد ما بطلت ، وانا برجع اخر الليل ومش جنبك ، استحملتني ولسه بتستحملني ف كل زنقه مذاكره وانا بكون متعصب وتيجي تبص عليا وتقولي ربنا يكرمك كمل يلا ، بتديني دفء و طاقه بطلتك عليا بس والله وده كتير جدا
احنا صحاب وبتحكيني حاجات يمكن محدش يعرفها غيري انا وانت وربنا العالم بيها وكنت ويارب افضل اكبر حافظ لكل كلمه بتقولهالي
كل مره كنت بتقولي قوم صلي وانا مكنتش اعرف قيمتها والشيطان ملازمني كنت انت ملاكي الحارس
كل صلاه فجريه بنصليها مع بعض رغم انك بتبقى مستعجل وعاوز تنام بتستحمل مرقعتي لحد ما اقوم عشان نصلي جماعه
بعد كل صلاه جمعه وانت بتدور علينا عشان اشيل من ايدك الطلابات
ديما بترفع من شأني وقدام كل الناس بتكبرني وسط اي حد
لقب دكتور اللي لسه مستحقهوش بس بتناديني بيه عشان تخليني اكون متحفز اني اكون كده فعلا
الراجل ده شال هموم كتير ف الدنيا وعلمنا كتير ف الدنيا وكل فضل ف أي إنجاز بعمله ف المقام الأول يرجعله هو ، لانه فعلا قوم فيا التربية السليمة واني اعتمد ع نفسي واني اكون سند لغيري زي ما انت سند لينا
انا بحاول اكون ابن صالح ف يارب تكون شايفني بحاول وتساعدني ع كده وتدعيلي
كل سنه وانت طيب يا حاج وربنا يطول ف عمرك وكل اللي تتمناه فينا يتحقق ومنخذلكش ابدا انا واخواتي ويجعل ديما حسك مالي عليا الدنيا وما فيها اللهم امين
*ملحوظه مفيش زعل ع النتيجه بتاعت السنه دي ها ماشي

هذه الرسالة رغم نقلها كما هي باللغة العامية إلا أنها تحمل في مكنونها الكثير والكثير
وحق لنا أن نسلط الضوء على نموذج قلما وجدناه في عصرنا هذا فنعم الابن ونعم الأب بارك الله في أمثالكم

قد يعجبك ايضا
تعليقات