عروسة النوبة
بقلم / ناجح أحمد
عروسة النوبه
من طوبه
محبوبه
و توبه توبه
مخطوبه
للغربه
و منسوبه
للتربه
و نهر النيل
رنتها
بالخلخال
و ضفايرها
شعر و حرير
مدهون من الزبدة
و مضفر
من العنبر
مليانه حنين
عروسة النوبه
يا فلقة القمره
تجيني منين
مع الفجريه
على قصر النيل
جايه
و لا مش جايه
عرفيني
يا نور العين
عروسة النوبه
دي عروستي
جايه و عزوتها
في عزوبتها
و فستانها
جميل
و حرير
عروسة النوبه
دي عروستي
بشايرها
صلصال
و بيتها
زعف
و حصير
مليانه من طيبه
طيبتها
و عذوبتها
مليانه عسل و غدير
عروستي
ملونه بلون النيل
و القُصَّهْ
على الجنبين
ملمعه بزهرة لوتس
و كحل العين
من حجر البحر
مطحون
من مرمر الفراعين
عروسة النوبه
خروبه
طعمها مسكر
و شجرة حنان
بيني و بينك
طعمها أجمل من السكر
رسمتها
مقطقطه
تخييل و تخبل
و حمرة خدودها مورده
تهبل
و تسكر
من كتر حبي ليها
ماعدش عقلي
يفكر
و خلاص
أروحلها
و هوه
اللي مقدر مقدر
ضفتها شرق و غرب
هيه واقفه
على الجنبين
و الوادي بيها مخضَّر
و صار عادي
أقابلها
على الجبيلين
تشاور
تعالى
قرب
مستنياك من سنين
قابلني
على ضفتي
التانيه
تعالى قبلين
و لا حتى بعدين
ميهمش
همه مش عارفين
قلت
آمين
الموت فيك
هيجيني
مين و من فين
مايهمنيش من المجانين
و الموت فيك
يا مورده الخدين
أحسن من إني أموت
من البين
و أعيش وحدي حزين
ناجح أحمد