منيرة حبها حبيب مات عليها
للشاعر الشعبي المحبوب الرائع/ الحبيب الميساوي صاحب ديوان شعري تحت عنوان “أمواج ”
كتب عبدالله القطاري من تونس
هذا الشاعر صاحب إحساس مرهف يحكي كيف وقع في شباك حبيبته إلى درجة أن صار متيما ولا يقدر على فراقها
مهما كانت العراقيل :
واش حوجك. يا قلب. تخمم. فيها
لا تعرف امواليها
وحتي السكن تسكن بعيد عليها
واش حوجك واش لزك
لطم هواها كركرك ونزك
فج مج في غريق الملوسي دزك
ولا خبر يجيك من تاليها
واش لزك يسلب هواها عزك
تخذع وتركع لتراب رجليها
واش حوجك تصلي
بيرنازح تسني عليه ادللي
لاك عنتر لا قيس لا متولي
ومهما نبهتك نصيحتي تخليها
وانت تملك من بنزرت لقبلي
اما اريانه عندها امواليها
من بنزرت لرماده
رسوم حجتك ثابته بحداده
واش حوجك قلبت العاده
ودخلت في حرب طاحنه لياليها
غريق البحر ما تخرجو جداده
مسارب المحبه متشعبه بلاويها
واش حوجك تزيد اوجاعي
وتحير هواجس دافنه في ظلاعي
يوم شفتها. ضرب حب حبها فزاعي
دق شق حرق الحاش بكلاويها
خنس حبس الدم في البدن واصباعي
بهت سكت ما صبت ما انقول ليها
ما صبت عقلي خذاتو
لظ نبضها خظ الدماغ خظاتو
تعظ القلب ترذ في نبضاتو
مشهاب ذره شب من عينيها
ساخ البدن دعدعت لضاتو
تقتل وتحيي. والمحكمه تواليها
كلامك كلام موده
تمد مد طول المدى والمده
رد. المحبوب حامل وده
لمح ياسر مشاعر تواتيها
حب حامي حار هرى المعده
تحملت حر حرارة عوافيها
تحملت الفراق وناره
حنضل ما ينطاق عقد مراره
نار لهيبه لا هبه كباره
بعد البسمه شورت بيديها
خلت دموعي ساكبه فواره
تسقي الدبدابه اليابسه ترويها
خليتني نستني
مشنوق معلق ما بين منا ومنا
خليت قلبي بالاوهام ادنى
مزقت جاشي وجشتي وما فيها
تمنيت تحني وتتمحني يا حنا
قداش مشاعر صادقه اسحقتيها
قداش شوك عذابك
واتناسيت ما حسيت حس احبابك
بلجت وسكرت بالسكاره بابك
حرام قلوب العاشقه حرقتيها
جيتك بالمعبود دز جوابك
لعلى الزهور الذابله تحيييها
بالله دزي رساله
بين الحياه والموت فاني الحاله
وخبري الاجوار والعشاق ع واله
واكتبي على قبري حب لا تنسيها
واذكري المقتول والقداله
منيره حبها حبيب مات عليها
