القانون يحمي المغفلين ..

بقلم _ ياسمين ابراهيم

كان في بنوته جميله كانت ف اعدادي مكنتش بتذاكر اه بس حلمها تبقي حاجه كبيره جت ف الامتحان و جابت مجموع خيبان قعدت تعيط و خلت الدنيا قلبان قالت لمامتها ياتري هدخل ثانويه عامه بصت مامتها و قالت اكيد دي السنه اللي فاتت كانت لمه ضحكت البنت وقالت ايوه وادخل فنون جميله وابقي مهندسه شهيره و مرت الايام و جه التنسيق لقت ان الثانويه العامه مطلعتش لمه وبتقبل من مجموع عالي ابوها قال هتدخلي صنايع عيطت تاني و قالت دانا كان نفسي ادخل فنون جميله بص ابوها و قال ما باليد حيله .عدي وقت وقدمت صناعي نفسك ف قسم ايه خلينا زغرفه اهو برضوا ابقي مهندسه ديكور عدي شهر كمان وهنا اتقلب الكيان ظهرت مدرسه مكنتش ف الحسبان لا ليها اصل ولا ليها كيان بس كانوا بيقولوا دي مدرسه ثانوي خاصه البنت شافتها شبطت فيها زي العيال و قالت دخلوني فيها دي مدرسه عال العال قلولها دي سنتر قالت لا دي فرع من مدرسه كبيره وكمان فيها طالبه وعيال كتيره وقدمت فيها و بقيت طالبه ثانويه عامه قد الدنيا و مرت الايام و البنوته اللي كانت ف تالته اعدادي بقت عروسه ف تالته ثانوي بقت الاولي بقت شطوره و بينضرب بيها المثل من الاوائل كل عام بس يا خساره طلع كلام ف كلام جت المدرسه قفلت ولا اكن كان ليها وجود من كل اللي فات استغرب العيال بنين وبنات فين المدير و المدرسين فين الطلبه و المشرفين قالوا ( اه اصل والد المدير توفي ) زاد الكلام انه كدب و اوهام خافت البنت و حست انها ف غفله جتلها فكره فرحت بيها قالت انا هتصل بالمدرسه الكبيره اطمن قلبي و كمان قلوب كتيره اتصلت فعلا( الو لو سمحتي انا طالبه ثانوي عندكوا ………..) بس هنا سمعت الكلمه الاليمه ( ثانوي ايه احنا مبنقبلش طلاب ثانوي بقالنا اربع سنين ) ايه اومال انا ايه اومال كنت في ايه قالوا انتي كنتي ف مدرسه وهميه ؟؟؟ عياط حزن و الم وجع و دموع مشاعر اتلغبطت عايزين حقنا قالو النيابه راحوا النيابه قالوا الوزاره راحوا الوزاره قالو القانون لا يحمي المغفلين !
يعني ايه !! يعني من عروسه تالته ثانوي لبنوته تالته اعدادي ..وجع الاب لما يسمع بنته بتقول ( انا كان نقصلي شهر و ادخل الجامعه و ابقي مهندسه شهيره ) و بكاء الام لما تسمع ( رجعوني اعدادي و بقيت فشله كبييره ) غضب ضجه ثوران ثوره ؟؟ ايوه ثوره يلا نعمل ثوره و نقول (يا وزير قول الحق احنا طالبه ولا لا ) قالوا و قالوا و فعلا سمعوا ليهم و طلع معاهم حق هما طالبه قالوا بس انتوا عايزين الحق ايه يثبت انكم كنتوا ثانوي احنا عايزين امتحان قدرات علشان نتاكد انكم فعلا ع حق قالوا موافقين ربنا دايما بينصر المظلوم و بيرجع الحق دخلو الامتحان و شافوا من الامتحانات الوان بس الحمدلله نجحوا و اتسجلوا بس مش زي زمان رجعوا تاني طلاب ثانوي بس المرادي ع حق كمان خلصوا الثانويه و دخلوا الكليه و البنوتة رجعت عروسه و دخلت هندسه زي ما كان حلمها زماان …