الشيخ بهلول ومولد ولاد الأصول

شيخ بهلول قولي يابركة ربنا يزيدك من علمه :
هو يطلع إيه مهرجان الجونة دا اللي مصدعين دماغنا به كل سنة ؟ تكونشي الجونة مرات الجون حاجة في الكورة يعني ؟ ولا بسم الله الحفيظ تكون من الجن؟ فهمني الله لا يسيئك العيال ولادي هروني أسئلة وأنا أبيض ياورد مش عارفة أرد

شوفي يابنتي : بتقول الأساطير القديمة اللي عمرها حوالي 3 سنين تقرييا إن الجونة دي أساسا اسم منطقة سكنية يعيش فيها كائنات بشرية لكن مش من فصيلتنا، من فصيلة ترجع أصولها للقروش والديناصورات
الفصيلة دي لا تسمح للفصائل التانية بالتعايش معها وإلا اتختلط الحابل بالنابل واتساوت الرؤوس ودا طبعا مرفوض

في يوم صحيوا الصبح قرروا يعملوا مولد كبير ،مولد ولاد الأصول زي مولد سيدك اللبلوبي وسموه مهرجان الجونة السنيمائي الدولي
أنا. : ااااه يعني أفلام بقى واجتماعات وندوات ومناقشات رجال العلم والفن ؟؟؟؟دي حاجة عظيمة خالص خالص ياشيخنا

الشيخ بهلول. : يعني حاجة زي كدا بس مش بالظبط هو في تجمعات مش اجتماعات شعارها قلعني شكرا
وفي مناقشات بس حوالين فساتين الفنانات ومين فيهم قلعت أكثر وبقت ترند اللي فتحت بلكونة من فوق ولا اللي فتحت البدروم على آخره ولا اللي نسيت نص هدومها التحتاني ولا ياعيني اللي مقدرتش تكمل قماش الفستان فتلاقيه ضرب من تحت أو مقطع من فوق .

والأهم من كدا حواراتهم والأسئلة عن اسم الديزاينر اللي صمم الفستان واللي نفذ الفستان واللي شار على أمها بنفس ذات الفستان وبعد كدا مباراة في أسعار الفساتين اللي ثمن الواحد فيهم يجوز خمس أو ست شباب وبنات
ومننساش رجالة المهرجان وأولهم طبعا عيلة ساوريس راعية المهرجان والمتكفلة به كفالة اليتيم المحروم الله يزيدهم كمان

وكمان والفنانين اللي كل واحد فيهم نافخ صدره زي الديك الرومي وفاشخ بؤه مترين وهو موقف مراته عريانه يتصور جنبها لا وإييييه لازم تطلع على الريدكاربت وتتصور من وشها وجنبها وظهرها وكووووووول حته في جسمها ، أومال إيه مش لازم تمتع جمهورها العريض ماهي زوجة فنان عريض لازم ترفع راسه
وكل دا ليه بقى برضه ؟
عشان الإنسانية المعذبة يابنتي وإطلاق شعلة التنوير الثقافي والفني في( مسر ) والعالم ، أحببتشي يا( مسر ) وكمان نوصل للعالمية التوسعية الأفقية الرأسية للملوخية بالتقلية .

أنا : كدا فهمت، يعني كل الهيصة دي عشان مش عارفين يعملوا شوية ملوخية وبيداروا خيبتهم ويعملوا مهرجان، طب كان حد دعاني وكنت رحت عملتهم أجدع طشه ملوخية وشهقت لما قلت يابس بدل المصاريف والكلفة ع الفاضي والنبي دي مش قلة عقل ياشيخ بهلول؟ !!
بهلول. : تصدقي يابنتي عندك حق، قومي قومي اعملي لي طبق ملوخية وهاتي العيال تاكل واقفلي المخروب التليفزيون دا واقطعي الزفت النت بلا جونة بلا وجع دماغ ، تحيا الملوخية

**** مايسة إمام إبراهيم ****